ترک صدر رجب طیب ایردوان نے پاکستان اور بھارت کے درمیان حالیہ کشیدگی کے خاتمے پر خوشی کا اظہار کرتے ہوئے برادر پاکستانی قوم کے ساتھ اپنی مکمل حمایت کا اعلان کیا ہے۔
انہوں نے کہا کہ، ترکیہ ہر حال میں پاکستان کے ساتھ کھڑا ہے اور چاہتا ہے کہ، جنگ بندی کے بعد پیدا ہونے والا پُرامن ماحول پانی سمیت تمام حل طلب مسائل کے حل کو آسان بنائے۔
ترک صدر نے کابینہ اجلاس سے خطاب میں کشمیر میں ہونے والے دہشت گرد حملے اور پاکستان پر ہونے والے میزائل حملوں پر ترکیہ کے مؤقف کا حوالہ دیتے ہوئے کہا کہ، دونوں ممالک کے درمیان خطرناک تناؤ کو کم کرنے کے لیے ترکیہ نے انتھک کوششیں کی ہیں۔
صدر ایردوان نے بتایا کہ، انہوں نے وزیراعظم پاکستان شہباز شریف سے ٹیلیفونک رابطہ کیا اور اہم معاملات پر تبادلہ خیال کیا۔ ساتھ ہی انہوں نے پاکستانی عوام کو ان کے صبر، تحمل اور دانشمندانہ رویے پر مبارک باد دی۔ ان کا کہنا تھا کہ، اشتعال انگیزی میں نہ آیا جائے، ترکیہ پُرامن حل کا خواہاں ہے۔
انہوں نے کہا کہ، ہمیں پاکستان اور بھارت کے درمیان جنگ بندی پر دلی خوشی ہے، اور ترکیہ برادر پاکستانی قوم کے ساتھ ہر اچھے اور برے وقت میں کھڑا رہے گا۔
