پاکستان انٹرنیشنل ایئرلائنز (پی آئی اے) نے جمعرات کو اعلان کیا ہے کہ 30 مارچ سے لاہور سے لندن کے لیے براہِ راست پروازیں دوبارہ شروع کی جائیں گی۔
پی آئی اے کے ترجمان کی جانب سے جاری بیان کے مطابق، ایئرلائن برطانیہ کے لیے اپنی پروازوں میں اضافہ کر رہی ہے۔ترجمان نے کہاکہ مانچسٹر کے لیے پروازوں کی بحالی اور 29 مارچ سے اسلام آباد سے لندن پروازوں کے اعلان کے بعد، ایئرلائن نے 30 مارچ سے لاہور سے لندن براہِ راست پرواز شروع کرنے کے انتظامات بھی حتمی شکل دے دی ہے۔انہوں نے مزید کہا کہ مارچ کے اختتام تک برطانیہ کے لیے مجموعی طور پر سات پروازیں چلائی جائیں گی۔
بیان کے مطابق، برطانیہ میں مقیم پاکستانیوں اور اوورسیز کمیونٹی کی طویل عرصے سے کی جانے والی درخواستوں اور زیادہ طلب کے پیشِ نظر پروازوں میں اضافہ کیا جا رہا ہے۔ برطانیہ کے لیے تمام پروازیں مکمل مسافروں کے ساتھ آپریٹ ہو رہی ہیں۔
ترجمان نے بتایا کہ اسلام آباد–لندن اور لاہور–لندن پروازوں کی بحالی کی تاریخیں طلب اور ایئرلائن کی تیاری کو مدنظر رکھتے ہوئے مسلسل دنوں میں رکھی گئی ہیں۔ان کے مطابق، پی آئی اے اسلام آباد سے لندن کے لیے ہفتے میں تین جبکہ لاہور سے لندن کے لیے ہفتے میں ایک پرواز چلائے گی۔ مستقبل میں پاکستان سے برطانیہ کے دیگر شہروں کے لیے بھی مزید پروازیں چلانے کا منصوبہ ہے، جبکہ لندن کے لیے پروازوں میں بتدریج اضافہ کیا جائے گا۔
یاد رہے، ستمبر 2025 میں پی آئی اے کو تقریبا پانچ سال کے وقفے کے بعد برطانیہ کے لیے براہِ راست پروازیں دوبارہ شروع کرنے کی اجازت مل گئی تھی، جس کے بعد پہلے مرحلے میں مانچسٹر کے لیے پروازوں کا آغاز کیا گیا۔
دو ماہ قبل ایئرلائن نے اعلان کیا تھا کہ وہ چھ سال کے وقفے کے بعد مارچ 2026 میں لندن کے لیے براہِ راست پروازیں دوبارہ شروع کرے گی۔
