کولمبیا کے صدر گستاوو پیٹرو نے برطانوی نشریاتی ادارے بی بی سی سے گفتگو میں خدشہ ظاہر کیا ہے کہ وینزویلا کے بعد اب امریکی فوج کولمبیا کے خلاف بھی کارروائی کر سکتی ہے۔ صدر کا کہنا تھا کہ امریکہ دیگر ممالک کو اپنا اثر و رسوخ سمجھنے لگا ہے، اور یہی سوچ خطے کے لیے خطرناک ثابت ہو سکتی ہے۔
یہ بیان ایسے وقت میں سامنے آیا ہے جب امریکی صدر ڈونلڈ ٹرمپ کی جانب سے کولمبیا کے خلاف فوجی کارروائی کی دھمکیاں دی جا چکی ہیں۔ صدر پیٹرو نے کہا کہ امریکہ دنیا پر غلبہ حاصل کرنے کی پالیسی سے آگے بڑھتے ہوئے اب خود کو دنیا سے الگ تھلگ کرنے کی راہ پر گامزن دکھائی دیتا ہے۔
کولمبیا کے صدر نے امریکی امیگریشن اینڈ کسٹمز انفورسمنٹ (ICE) پر سخت تنقید کرتے ہوئے الزام لگایا کہ اس کے اہلکار نازی بریگیڈز کے انداز میں کام کر رہے ہیں۔ ان کا کہنا تھا کہ ٹرمپ انتظامیہ کے دور میں آئیس کی کارروائیوں میں نمایاں اضافہ ہوا ہے، جنہیں حکومت جرائم اور غیر قانونی طور پر امریکہ میں داخل ہونے والے تارکینِ وطن کے خلاف کریک ڈاؤن قرار دیتی ہے۔
وینزویلا میں امریکی کارروائیوں کے بعد صدر نکولس مادورو کی گرفتاری کے تناظر میں صدر ٹرمپ نے یہ بھی کہا تھا کہ کولمبیا کے خلاف فوجی کارروائی ممکن ہے۔ ٹرمپ نے متعدد مواقع پر صدر پیٹرو کو یہ مشورہ بھی دیا کہ وہ اپنی حفاظت کریں، جس پر کولمبیا کے صدر کی جانب سے سخت ردِعمل سامنے آیا
