بنگلہ دیش نے کرکٹ کے میدان میں بھارت کے ساتھ تعلقات کو مزید مضبوط بنانے کی خواہش ظاہر کر دی ہے اور اس سلسلے میں دونوں ممالک کے درمیان نئے تعاون کے امکانات پر غور شروع کر دیا گیا ہے۔
بنگلہ دیش کرکٹ بورڈ کے مطابق، ادارے نے بھارتی کرکٹ کنٹرول بورڈ سے باضابطہ رابطہ کیا ہے تاکہ موجودہ روابط کے ساتھ ساتھ نئے شعبوں میں بھی تعاون کو فروغ دیا جا سکے۔
گلف نیوز کے مطابق، بورڈ کے ڈائریکٹر کرکٹ آپریشنز ناظم الحق عابدین فہیم نے بتایا کہ یہ رابطہ ایک باضابطہ خط کے ذریعے کیا گیا، جو ای میل کے ذریعے بھارتی بورڈ کو بھیجا گیا۔ ان کے مطابق دنیا بھر کے کرکٹ بورڈز کے ساتھ معمول کے رابطوں کے تحت یہ پیش رفت کی گئی ہے۔
انہوں نے بتایا کہ خط میں دونوں ممالک کے درمیان ہونے والے آئندہ میچوں کا بھی ذکر کیا گیا ہے۔ شیڈول کے مطابق بھارتی مرد ٹیم ستمبر میں بنگلہ دیش کا دورہ کرے گی، جبکہ بنگلہ دیش کی خواتین ٹیم بھی جلد بھارت کا دورہ کرے گی۔
فہیم کے مطابق، ان طے شدہ دوروں کے علاوہ خط میں مزید باہمی تعاون کے امکانات پر بھی بات چیت کی درخواست کی گئی ہے تاکہ دونوں ممالک کے درمیان کرکٹ تعلقات کو مزید وسعت دی جا سکے۔
