امریکی ریاست نیواڈا کے شہر لاس ویگاس کو فٹبال ورلڈ کپ 2026 کے ڈرا کی میزبانی کے لیے منتخب کر لیا گیا ہے۔ رپورٹس کے مطابق، یہ تقریب جمعے، 5 دسمبر 2025 کو منعقد ہوگی۔
یہ انتخاب کینیڈا اور میکسیکو کے دیگر شہروں پر برتری حاصل کرنے کے بعد کیا گیا، حالانکہ فیفا کی جانب سے باضابطہ طور پر تاریخ اور مقام کی تصدیق تاحال نہیں کی گئی۔
یہ پہلا موقع ہوگا جب فٹبال ورلڈ کپ تین ممالک ، امریکہ، کینیڈا اور میکسیکو میں منعقد کیا جائے گا، اور اس بار مقابلے میں شامل ٹیموں کی تعداد بھی 32 سے بڑھا کر 48 کر دی گئی ہے۔
دلچسپ بات یہ ہے کہ، اگرچہ لاس ویگاس کو ڈرا کی میزبانی دی گئی ہے، لیکن شہر کا اسٹیڈیم ’الیجائنٹ اسٹیڈیم‘ میچز کی میزبانی کے لیے منتخب نہیں کیا گیا۔ امریکہ میں کل 11 شہروں کو میچز کے لیے چنا گیا ہے، میکسیکو کے تین اور کینیڈا کے دو شہروں کو بھی میزبان شہروں میں شامل کیا گیا ہے۔
امریکہ کے میزبان شہروں کو تین خطوں میں تقسیم کیا گیا ہے، مشرقی خطے میں نیویارک/نیوجرسی، فلاڈیلفیا، بوسٹن، میامی اور اٹلانٹا شامل ہیں؛ وسطی خطے میں کینساس سٹی، ڈیلاس اور ہیوسٹن؛ جبکہ مغربی خطے میں لاس اینجلس، سیئٹل اور سان فرانسسکو بے ایریا شامل ہیں۔
ڈرا میں 12 گروپس کی تشکیل کی جائے گی، جن میں ہر گروپ میں 4 ٹیمیں ہوں گی۔ میکسیکو (گروپ اے)، کینیڈا (گروپ بی) اور امریکہ (گروپ ڈی) کو پہلے ہی ان کے گروپس میں شامل کر دیا گیا ہے۔
ورلڈ کپ کا فائنل میچ 19 جولائی 2026 کو نیوجرسی کے میٹ لائف اسٹیڈیم میں کھیلا جائے گا۔
ڈرا کی تقریب کے لیے لاس ویگاس کا جدید ترین ’سفیئر‘ (Sphere) ہال سب سے مضبوط امیدوار سمجھا جا رہا ہے۔ اس ہال کی گنجائش 17 ہزار سے زیادہ افراد کی ہے اور اسے 2023 میں کھولا گیا تھا۔
قابلِ ذکر بات یہ ہے کہ، لاس ویگاس نے 1994 کے ورلڈ کپ کے ڈرا کی بھی میزبانی کی تھی، لیکن اس وقت بھی شہر کو کسی میچ کی میزبانی نہیں ملی تھی، اور یہی صورتحال اس بار بھی برقرار ہے۔
ورلڈ کپ کے لیے کوالیفائنگ میچز مارچ 2026 میں انٹر کانٹیننٹل پلے آف کے بعد مکمل ہو جائیں گے۔
