دنیا بھر میں کچھ درخت اور پودے ایسے بھی پائے جاتے ہیں جنہیں قدرتی طور پر موسم کی تبدیلیوں کا احساس ہوتا ہے، اور وہ بارش کی آمد سے قبل مخصوص انداز میں ردعمل ظاہر کرتے ہیں۔ اگرچہ ان کی یہ کیفیت سائنسی طور پر "پیشگوئی” نہیں کہلاتی، لیکن ماہرین نباتات اسے ماحولیاتی حساسیت کا نتیجہ قرار دیتے ہیں۔
ایسا ہی ایک درخت صنوبر (Clusia rosea) ہے جو بارش سے پہلے اپنے پتے موڑ لیتا ہے یا جھکا دیتا ہے۔ یہ ردعمل درخت کے خلیوں پر فضا میں نمی کے اضافے اور ہوائی دباؤ میں کمی کے اثرات کی وجہ سے ظاہر ہوتا ہے۔ یہ درخت مغربی ممالک میں کرسمس کے درخت کے طور پر بھی استعمال ہوتا ہے۔
اسی طرح امریکہ کے جنوبی علاقوں میں پایا جانے والا ٹیکساس سیج (Leucophyllum frutescens) نامی پودا بھی بارش کی آمد کا اشارہ دیتا ہے۔ اس پر بارش سے کچھ دن یا چند گھنٹے پہلے ہی جامنی پھول کھلنے لگتے ہیں، جو اس کی نمایاں خصوصیت سمجھی جاتی ہے۔
ایک اور دلچسپ پودا چھوئی موئی (Mimosa pudica) ہے جو بارش سے پہلے اپنے پتے بند کر لیتا ہے۔ اس کا ردعمل نمی اور روشنی میں تبدیلی کا نتیجہ ہوتا ہے، اور بعض اوقات یہ عمل چند لمحوں میں واضح ہو جاتا ہے۔
یہ تمام درخت اور پودے نہ صرف قدرت کے پیچیدہ نظام کا حصہ ہیں بلکہ یہ ہمیں اس فطری ہم آہنگی کا پیغام بھی دیتے ہیں جو زمین پر زندگی کو متوازن رکھتی ہے۔ اگرچہ یہ عمل سائنسی پیشگوئی کا متبادل نہیں، لیکن فطرت سے جُڑے یہ اشارے انسانی مشاہدے کے لیے ایک دلچسپ اور سبق آموز پہلو ضرور رکھتے ہیں۔
