دہلی اسمبلی کے حالیہ انتخابات میں عام آدمی پارٹی کی واضح شکست نے کئی سوالات کو جنم دیا ہے ۔سیاسی تجزیہ نگار و دانشور حیرانی کا اظہار کر رہے ہیں کہ وہ کون سے عوامل ہیں جن کی وجہ سے عام آدمی پارٹی کو شکست سے دوچار ہونا پڑا اور بی جے پی کو واضح برتری حاصل ہوئی ۔ آئیے جائزہ لیتے ہیں کہ عام آدمی پارٹی و شکست کا سامنا کیوں کرنا پڑا ۔
دہلی اسمبلی انتخابات میں عام آدمی پارٹی کو شکست کی متعدد وجوہات سامنے آئی ہیں۔
مبصرین کا کہنا ہے کہ عام آدمی پارٹی کے سرکردہ رہنماؤں، بشمول اروند کیجریوال اور منیش سسودیا، پر بدعنوانی کے الزامات عائد کیے گئے، جس سے پارٹی کی ساکھ متاثر ہوئی اور ووٹرز کا اعتماد متزلزل ہوا۔ اسی طرح بھارتیہ جنتا پارٹی (بی جے پی) نے دہلی میں 27 سال بعد حکومت بنانے کے لیے بھرپور انتخابی مہم چلائی، جس میں ترقیاتی منصوبوں اور مڈل کلاس کے لیے بجٹ میں رعایتوں پر زور دیا گیا۔ اسی طرح اگرچہ حالیہ انتخابات میں کانگریس کو کوئی نشست حاصل نہیں ہوئی، لیکن اس کی انتخابی مہم نے عام آدمی پارٹی کے ووٹ بینک کو متاثر کیا، جس سے بی جے پی کو فائدہ پہنچا۔ عام آدمی پارٹی کی شکست کی ایک اور اہم وجہ یہ بھی بیان کی جا رہی ہے کہ اس بار ووٹرز کا ٹرن آؤٹ 60.42 فیصد رہا، جو 2020 کے مقابلے میں کم تھا۔ کم ٹرن آؤٹ نے عام آدمی پارٹی کی کارکردگی پر منفی اثر ڈالا۔
مندرجہ بالا عوامل کے نتیجے میں، عام آدمی پارٹی دہلی اسمبلی میں اپنی اکثریت برقرار رکھنے میں ناکام رہی، اور بی جے پی نے 47 سے زائد نشستیں حاصل کر کے 27 سال بعد دہلی میں حکومت بنانے کی راہ ہموار کر لی ہے ۔
