سعودی وزیر خارجہ شہزادہ فیصل بن فرحان نے کہا ہے کہ سعودی عرب، ترکیہ اور پاکستان کے درمیان طے پانے والا سہ فریقی دفاعی معاہدہ تینوں ممالک کے گہرے برادرانہ اور اسٹریٹجک تعلقات کی عکاسی کرتا ہے۔
انہوں نے سوشل میڈیا پلیٹ فارم ایکس پر اپنے بیان میں کہا کہ سعودی ولی عہد محمد بن سلمان، ترک صدر رجب طیب ایردوان اور وزیراعظم پاکستان محمد شہباز شریف کی جانب سے ‘مکہ باہمی دفاعی معاہدے’ پر دستخط تینوں ممالک کے مضبوط تعلقات کی تصدیق ہیں۔
شہزادہ فیصل بن فرحان نے اس معاہدے کو دفاعی تعاون کے سفر میں ایک اہم سنگ میل قرار دیا۔ ان کے مطابق یہ معاہدہ خطے کی سلامتی اور استحکام کو متاثر کرنے والے چیلنجز اور خطرات سے نمٹنے کے لیے مشترکہ کوششوں کو یکجا کرنے کی خواہش کا نتیجہ ہے۔
سعودی وزیر خارجہ نے کہا کہ یہ معاہدہ تینوں ممالک اور ان کے عوام کے مفادات کی خدمت کرے گا، پورے خطے پر مثبت اثرات مرتب کرے گا اور ایسے محفوظ مستقبل کی راہ ہموار کرے گا جہاں ترقی اور خوشحالی کے مواقع مزید مضبوط ہوں۔
یہ معاہدہ مکہ مکرمہ میں سعودی ولی عہد محمد بن سلمان، ترک صدر رجب طیب ایردوان اور وزیراعظم شہباز شریف کے درمیان ہونے والے سربراہی اجلاس کے بعد طے پایا۔
