وزیراعظم محمد شہباز شریف نے پاک افغان سرحد پر افغان حکومتی فورسز اور بھارتی کارروائیوں پر گہری تشویش ظاہر کی ہے۔ ان کا کہنا تھا کہ دشمن کی اشتعال انگیزیوں کا بھرپور جواب دیا جائے گا اور پاکستان کی خودمختاری پر کوئی سمجھوتہ نہیں ہوگا۔
وزیراعظم نے کُرم سیکٹر میں افغان حکومتی فورسز کے حملے کو ناکام بنانے پر پاک فوج کو خراجِ تحسین پیش کیا۔ انہوں نے کہا کہ فوج نے دشمن کو مؤثر اور بہادری سے جواب دیا۔
وزیراعظم نے اس معاملے پر غور کے لیے وفاقی کابینہ کا اجلاس بھی کل طلب کر لیا ہے۔ اجلاس میں افغان حکومتی فورسز اور بھارت کی اشتعال انگیزیوں کے ساتھ ساتھ ملک کی سیاسی اور معاشی صورتحال پر بھی بات چیت کی جائے گی۔
ذرائع کے مطابق اجلاس میں وزیراعظم اپنے مصر کے حالیہ دورے کے بارے میں بھی کابینہ ارکان کو آگاہ کریں گے۔ اس کے علاوہ غزہ امن کانفرنس میں پاکستان کے کردار پر بھی گفتگو ہوگی۔
پاک فوج کے ترجمان ادارے آئی ایس پی آر کے مطابق افغان حکومتی فورسز نے 15 اکتوبر کو بلوچستان کے علاقے اسپن بولدک میں چار مختلف جگہوں پر حملے کیے، جنہیں سیکیورٹی فورسز نے ناکام بنا دیا۔ جوابی کارروائی میں 15 سے 20 طالبان جنگجو ہلاک ہوئے اور کئی زخمی ہوئے۔
آئی ایس پی آر نے بتایا کہ اس سے ایک دن پہلے بھی افغان حکومتی فورسز نے خیبر پختونخوا کے کُرم سیکٹر میں حملے کی کوشش کی تھی لیکن فوج نے دشمن کو پسپا کر دیا۔ جوابی کارروائی میں دشمن کی 8 چوکیوں اور 6 ٹینک تباہ ہوئے اور تقریباً 30 دہشتگرد مارے گئے۔
افغان حکومت کا کہنا ہے کہ اگر پاکستان کی طرف سے دوبارہ سرحدی خلاف ورزی کی گئی تو وہ سخت جواب دے گی۔ اسلام آباد نے حملوں کی ذمہ داری قبول نہیں کی لیکن کابل حکومت سے کہا ہے کہ وہ ٹی ٹی پی کو اپنی سرزمین پر پناہ دینے سے باز رہے۔
