پاکستان اور بنگلہ دیش نے بدھ کے روز ایک اہم پیش رفت کرتے ہوئے سفارتی اور سرکاری پاسپورٹ رکھنے والوں کو ویزا فری داخلے کی اجازت دینے پر اتفاق کر لیا ہے۔
یہ فیصلہ وفاقی وزیر داخلہ محسن نقوی اور بنگلہ دیش کے وزیر داخلہ لیفٹیننٹ جنرل (ر) جہانگیر عالم چودھری کے درمیان ہونے والی ملاقات میں کیا گیا۔ ملاقات میں دونوں ممالک کے درمیان دو طرفہ تعلقات، باہمی دلچسپی کے امور اور سیکیورٹی تعاون کے فروغ پر تفصیلی تبادلہ خیال کیا گیا۔
اس موقع پر دونوں رہنماؤں نے اس عزم کا اظہار کیا کہ پاکستان اور بنگلہ دیش کے درمیان تجارت کا حجم جلد ہی ایک ارب ڈالر کی حد عبور کرے گا، اور اس کے لیے تمام ممکنہ تعاون فراہم کیا جائے گا۔
ملاقات کے دوران اندرونی سلامتی، پولیس ٹریننگ، انسداد منشیات، انسانی اسمگلنگ کے خلاف اقدامات اور دہشتگردی کے خلاف مشترکہ حکمت عملی پر بھی گفت و شنید ہوئی۔ دونوں ممالک کے پولیس تربیتی اداروں کے درمیان تبادلہ پروگرامز کے آغاز پر بھی غور کیا گیا۔
مزید برآں، پاکستان اور بنگلہ دیش نے دو طرفہ تعاون کو مزید مؤثر بنانے کے لیے ایک مشترکہ کمیٹی کے قیام پر بھی اتفاق کیا۔ پاکستان کی جانب سے وفاقی سیکریٹری داخلہ خرم آغا اس کمیٹی کی سربراہی کریں گے۔
اس سلسلے میں جلد ہی بنگلہ دیش کا ایک اعلیٰ سطحی وفد اسلام آباد میں واقع نیشنل پولیس اکیڈمی کا دورہ بھی کرے گا۔
یہ پیش رفت نہ صرف دونوں ممالک کے درمیان تعلقات کو نئی جہت دے گی بلکہ خطے میں امن، استحکام اور ترقی کے لیے مشترکہ کوششوں کی راہ ہموار کرے گی۔
