واٹس ایپ نے حال ہی میں ایک نیا اور اہم پرائیویسی فیچر متعارف کرایا ہے جس کا نام "ایڈوانسڈ چیٹ پرائیویسی” رکھا گیا ہے۔ اس فیچر کا مقصد صارفین کو اپنی چیٹس کے حوالے سے زیادہ کنٹرول فراہم کرنا ہے، تاکہ ان کی گفتگو مزید محفوظ اور نجی رہ سکے۔
اس فیچر کے تحت اب صارفین دوسروں کو نہ صرف اپنی چیٹس ایکسپورٹ کرنے سے روک سکیں گے بلکہ بھیجی گئی تصاویر اور ویڈیوز کو خودکار طور پر ڈیوائس میں محفوظ ہونے سے بھی بچایا جا سکے گا۔ اس کے علاوہ، صارفین یہ بھی طے کر سکتے ہیں کہ کوئی ان کی چیٹ میں میٹا اے آئی کو مینشن نہ کرے یا اس سے کوئی سوال نہ پوچھے۔
ایڈوانسڈ چیٹ پرائیویسی ون آن ون اور گروپ چیٹس دونوں پر لاگو ہوگی۔ ایک بار یہ فیچر فعال ہو جائے تو کوئی بھی شخص چیٹ ہسٹری کو واٹس ایپ سے باہر منتقل نہیں کر سکے گا، اور نہ ہی آپ کی تصاویر اور ویڈیوز اُس کی گیلری میں خودبخود سیو ہوں گی۔ البتہ، فی الحال اسکرین شاٹ لینے کی اجازت برقرار ہے، لیکن کمپنی کا کہنا ہے کہ مستقبل میں اس پر بھی پابندی عائد کی جا سکتی ہے۔
یہ فیچر خاص طور پر اُن گروپ چیٹس میں مفید ہے جہاں شریک افراد ایک دوسرے کو ذاتی طور پر نہیں جانتے، مگر حساس یا ذاتی موضوعات پر بات چیت جاری رکھتے ہیں۔ اس فیچر کے استعمال کا طریقہ بھی نہایت آسان ہے: بس متعلقہ چیٹ کو کھولیں، اوپر چیٹ کے نام پر ٹیپ کریں، اور "ایڈوانسڈ چیٹ پرائیویسی” کے آپشن کو منتخب کریں۔ جیسے ہی یہ فیچر کسی گروپ میں آن کیا جاتا ہے، تمام ممبران کو ایک اطلاع موصول ہوتی ہے جس میں انہیں آگاہ کیا جاتا ہے۔
واٹس ایپ نے اعلان کیا ہے کہ یہ فیچر آئندہ چند مہینوں میں مرحلہ وار تمام صارفین کے لیے دستیاب کر دیا جائے گا، جس سے صارفین کو مزید بہتر پرائیویسی کا تجربہ حاصل ہو گا۔
