بھارت کی نیشنل انویسٹی گیشن ایجنسی (این آئی اے) نے ایک امریکی شہری اور 6 یوکرینی باشندوں کے خلاف امیگریشن قوانین کی خلاف ورزی کے الزامات میں چارج شیٹ دائر کر دی ہے۔ ان افراد پر غیر قانونی طور پر بھارت میں داخل ہونے، قیام کرنے اور بعض علاقوں میں بغیر اجازت نقل و حرکت کے الزامات ہیں۔
بھارتی میڈیا کے مطابق ساتوں افراد کو 13 مارچ 2026 کو گرفتار کیا گیا تھا۔ تفتیشی ادارے کا کہنا ہے کہ یہ افراد دسمبر 2025 میں سیاحتی ویزوں پر بھارت آئے اور بعد میں میزورم کے راستے میانمار گئے۔
این آئی اے کا الزام ہے کہ میانمار میں ان افراد نے بعض مسلح گروہوں کو ڈرون چلانے، ڈرون تیار کرنے اور سگنل جام کرنے سے متعلق تربیت دی۔ تفتیشی ادارہ اس بات کی بھی جانچ کر رہا ہے کہ ان گروہوں کے بھارت کے شمال مشرقی علاقوں میں سرگرم مسلح تنظیموں سے کوئی تعلق تھا یا نہیں۔
موجودہ چارج شیٹ میں ان افراد کے خلاف امیگریشن اینڈ فارنرز ایکٹ کے تحت مقدمہ بنایا گیا ہے۔ اہم بات یہ ہے کہ اس چارج شیٹ میں انسداد دہشت گردی کے قانون یو اے پی اے کی دفعات شامل نہیں کی گئیں۔
تاہم این آئی اے نے واضح کیا ہے کہ دہشت گردی سے متعلق تحقیقات ختم نہیں ہوئی ہیں۔ اگر مزید شواہد سامنے آئے تو ایجنسی بعد میں اضافی چارج شیٹ دائر کر سکتی ہے اور مزید دفعات بھی شامل کی جا سکتی ہیں۔
امریکی حکام نے بھی گرفتار امریکی شہری کا معاملہ بھارتی حکام کے سامنے اٹھایا ہے۔ کیس کی آئندہ سماعت یکم اکتوبر کو ہوگی، جبکہ امیگریشن کے الزامات اور دہشت گردی سے متعلق تحقیقات الگ الگ جاری رہیں گی۔
