صومالیہ میں بگڑتی ہوئی انسانی صورتحال نے سنگین رخ اختیار کر لیا ہے، جہاں جاری کثیرالجہتی بحرانوں کے باعث تقریباً 20 لاکھ بچے شدید غذائی قلت (ایکیوٹ مل نیوٹریشن) کے خطرے سے دوچار ہیں۔
بین الاقوامی امدادی اداروں اور ماہرین کی تازہ رپورٹس کے مطابق ملک اس وقت موسمیاتی تبدیلیوں کے اثرات، طویل خشک سالی، خوراک کی شدید قلت، معاشی عدم استحکام اور سکیورٹی چیلنجز کے بیک وقت دباؤ میں ہے، جس نے کمزور طبقات خصوصاً بچوں کو انتہائی غیر محفوظ بنا دیا ہے۔
ماہرین کے مطابق غذائی قلت کا یہ بحران نہ صرف بچوں کی جسمانی نشوونما کو متاثر کر رہا ہے بلکہ اموات کے خطرات میں بھی نمایاں اضافہ کر رہا ہے۔
ذرائع کا کہنا ہے کہ متاثرہ علاقوں میں بنیادی صحت کی سہولیات اور غذائیت سے بھرپور خوراک کی دستیابی محدود ہو چکی ہے، جبکہ امدادی سرگرمیاں فنڈز کی کمی، رسائی کے مسائل اور سکیورٹی خدشات کے باعث شدید دباؤ کا شکار ہیں۔
ماہرین نے خبردار کیا ہے کہ اگر فوری، مربوط اور بڑے پیمانے پر انسانی امداد فراہم نہ کی گئی تو یہ بحران مزید شدت اختیار کر سکتا ہے۔ عالمی برادری، ڈونر ایجنسیز اور متعلقہ اداروں سے فوری اقدامات اور وسائل کی فراہمی یقینی بنانے کی اپیل کی گئی ہے تاکہ لاکھوں بچوں کی جانوں کو لاحق خطرات کم کیے جا سکیں اور ممکنہ انسانی المیے کو روکا جا سکے۔
