ڈرامہ’’معمہ‘‘ ان دنوں ناظرین میں خاصی مقبولیت حاصل کر رہا ہے اور تقریباً اکیس اقساط نشر ہونے کے باوجود اس کی کہانی اب بھی لوگوں کے لیے تجسس اور دلچسپی کا باعث بنی ہوئی ہے۔ اس ڈرامے کی غیر روایتی اور قدرے پراسرار کہانی نے دیکھنے والوں کو ابتدا ہی سے اپنی طرف متوجہ کر رکھا ہے، یہی وجہ ہے کہ سوشل میڈیا پر بھی اس کے بارے میں مسلسل گفتگو جاری ہے۔
ڈرامے کی کہانی ایک ایسی عورت کے گرد گھومتی ہے جو بظاہر ایک عام زندگی گزار رہی ہے مگر اس کے کردار میں کئی ایسے پہلو ہیں جو ناظرین کو حیران کر دیتے ہیں۔
کہانی میں دکھایا گیا ہے کہ وہ عورت اکیلی رہتی ہے کیونکہ اس کا شوہر جیل میں قید ہے۔ وہ اپنے گھر کا ایک حصہ صرف شادی شدہ افراد کو کرائے پر دیتی ہے اور اسی عمل کے دوران مختلف کرداروں سے اس کا تعلق بنتا ہے۔
ڈرامے میں ایک پراسرار پہلو یہ بھی دکھایا گیا ہے کہ وہ اپنے کرائے داروں کو کھانے میں مبینہ طور پر کچھ ایسا ملا کر کھلاتی ہے جس کے بعد کرائے دار اس کی طرف غیر معمولی کشش محسوس کرنے لگتے ہیں۔ اس کے ساتھ ساتھ وہ اپنے کرائے داروں اور ملازمین کی جاسوسی بھی کرتی رہتی ہے جس سے کہانی میں مزید تجسس پیدا ہو جاتا ہے۔
یہ منفرد اور قدرے سنسنی خیز کہانی ہی اس ڈرامے کو عام ڈراموں سے مختلف بناتی ہے۔ یہی وجہ ہے کہ ناظرین اب تک یہ جاننے کے لیے بے تاب ہیں کہ اس عورت کے کردار کے پیچھے اصل حقیقت کیا ہے اور کہانی کا اختتام کس رخ پر جائے گا۔
اس ڈرامے میں مرکزی کردار معروف اداکارہ صبا قمر ادا کر رہی ہیں جن کا شمار پاکستان کی کامیاب اور باصلاحیت اداکاراؤں میں کیا جاتا ہے۔
ڈرامے کی ایک اور خاص بات اس کی بڑی اور مضبوط اداکاروں کی ٹیم ہے۔ مرکزی کردار کے ساتھ ساتھ کئی معروف اور نوجوان اداکار بھی اس ڈرامے میں شامل ہیں۔ ان میں عثمان مختار، نبیل زبیری، علی انصاری، انوشے عباسی اور نمرہ شاہد شامل ہیں، جبکہ تجربہ کار فنکاروں میں انجم حبیبی، سید جبران، اسما عباس اور محمد احمد بھی اہم کردار ادا کر رہے ہیں۔
