وزیراعظم پاکستان محمد شہباز شریف سے وزیراعلیٰ خیبر پختونخوا سہیل آفریدی نے ملاقات کی، جس میں صوبے میں امن و امان، ترقی اور عوامی فلاح سے متعلق امور پر تفصیلی تبادلہ خیال کیا گیا۔ ملاقات کے دوران وزیراعظم نے خیبر پختونخوا کے عوام کی ترقی و خوشحالی کے لیے وفاقی اور صوبائی حکومت کے درمیان قریبی تعاون کی ضرورت پر زور دیا۔
وزیراعظم نے کہا کہ خیبر پختونخوا میں امن و امان کا قیام وفاقی اور صوبائی حکومتوں کے باہمی تعاون کے بغیر ممکن نہیں، اس لیے اس حوالے سے مشترکہ کوششیں ناگزیر ہیں۔ انہوں نے اس بات پر بھی زور دیا کہ صوبے میں امن و امان کی صورتحال بہتر بنانے کے لیے صوبائی حکومت کو اپنی کوششیں مزید تیز کرنا ہوں گی اور انسداد دہشت گردی کے لیے صوبائی اداروں کو مضبوط کیا جائے۔
شہباز شریف نے واضح کیا کہ وفاقی اور صوبائی حکومتیں دہشت گردی کے مکمل خاتمے کے لیے مشترکہ کاوشیں جاری رکھیں گی۔ ان کا کہنا تھا کہ خیبر پختونخوا میں امن و امان کے قیام اور عوامی فلاح کے لیے صوبائی حکومت کو اپنی آئینی ذمہ داریاں پوری کرنی چاہئیں۔ انہوں نے کہا کہ صوبائی حکومت بااختیار ہے اور صحت و تعلیم کے شعبوں میں عوام کے لیے مؤثر اقدامات کیے جائیں۔
وزیراعظم نے اس عزم کا اعادہ کیا کہ وفاقی حکومت خیبر پختونخوا کے عوام کی بہتری کے لیے ہمیشہ کوشاں رہی ہے اور آئندہ بھی اپنے دائرہ اختیار میں رہتے ہوئے بھرپور تعاون جاری رکھے گی۔ انہوں نے کہا کہ خیبر پختونخوا وفاق کی ایک اہم اکائی ہے اور صوبے کے عوام کی خوشحالی کے لیے وفاقی حکومت اپنی ذمہ داریاں نبھاتی رہے گی۔
ملاقات کے دوران وزیراعظم نے قومی ترقی اور عوامی خدمت کے لیے وفاق اور صوبوں کے درمیان قریبی روابط اور مؤثر رابطہ کاری کو ناگزیر قرار دیا۔ انہوں نے خیبر پختونخوا میں ترقیاتی منصوبوں، بنیادی ڈھانچے کی بہتری، تعلیم، صحت اور روزگار کے مواقع بڑھانے کے لیے وفاقی سطح پر تعاون کی یقین دہانی بھی کرائی۔
وزیراعظم کا کہنا تھا کہ وفاقی حکومت تمام صوبوں کو ساتھ لے کر چلنے اور یکساں ترقی کے وژن پر عمل پیرا ہے، جبکہ باہمی مشاورت اور اشتراکِ عمل کے ذریعے قومی یکجہتی، استحکام اور خوشحالی کے اہداف کو مؤثر انداز میں حاصل کیا جا سکتا ہے۔
