ایک حالیہ سائنسی تحقیق میں یہ بات سامنے آئی ہے کہ نیند کے دوران کمرے کی روشنی یا ٹی وی آن رکھنا دل کی بیماریوں کے خطرے میں 50 فیصد تک اضافہ کر سکتا ہے۔ یہ خطرہ ان لوگوں میں بھی پایا گیا جو نیند کا مناسب دورانیہ رکھتے ہیں یا جن کی نیند کا معیار اچھا ہے۔
امریکی اور آسٹریلوی ماہرین کی تحقیق کے مطابق رات کے وقت روشنی میں سونا جسم کی حیاتیاتی گھڑی یا بایولوجیکل کلاک کو متاثر کرتا ہے۔ اس کے نتیجے میں دل کی بیماریوں، دل کے دورے، ہارٹ فیلئر اور فالج کے خطرات میں اضافہ ہوتا ہے۔
تحقیق میں تقریباً 90 ہزار برطانوی افراد کو شامل کیا گیا، اور طویل المدتی مشاہدے کے بعد ماہرین نے معلوم کیا کہ زیادہ روشنی میں سونے والے افراد میں ہارٹ فیلئر کا خطرہ 56 فیصد اور دل کے دورے کا خطرہ 47 فیصد تک زیادہ پایا گیا۔ اس کے علاوہ کورونری آرٹری ڈیزیز اور فالج کے امکانات بھی بڑھ گئے۔
ماہرین نے بتایا کہ خواتین میں رات کی روشنی کے منفی اثرات مردوں کے مقابلے میں زیادہ دیکھے گئے، اور اگرچہ رات کو مکمل اندھیرا ضروری نہیں، مگر کمرے کی روشنی کو کم رکھنا ایک محفوظ اور مؤثر طریقہ ہے۔
نیند کے دوران روشنی سے پرہیز کرنا ایک آسان اور سادہ حکمت عملی ہے جو دل کی صحت کو بہتر بنانے میں اہم کردار ادا کر سکتی ہے۔ ماہرین نے مشورہ دیا کہ بے خوابی یا نیند کی دیگر پریشانیوں کے لیے بھی احتیاطی اقدامات اپنائیں اور رات کی روشنی کو محدود رکھیں
