کیرالہ کے ضلع کولم میں واقع سپورٹس اتھارٹی آف انڈیا (سائی) کے ٹریننگ سینٹر میں جمعرات کی صبح دو زیرِ تربیت کم عمر کھلاڑیوں کی لاشیں برآمد ہوئیںہیں۔
پولیس کے مطابق، ہلاک ہونے والی ایک کھلاڑی کی عمر 17 برس تھی، جو ایتھلیٹکس کی تربیت حاصل کر رہی تھیں اور کوژیکوڈ کی رہائشی تھیں۔ وہ بارہویں جماعت کی طالبہ بھی تھیں۔ دوسری کھلاڑی 15 سال کی تھیں، جو کبڈی کی ٹریننگ لے رہی تھیں اور ترواننت پورم میں دسویں جماعت کی طالبہ تھیں۔
ابتدائی تفتیش میں خدشہ ظاہر کیا جا رہا ہے کہ دونوں کی موت خودکشی کے نتیجے میں ہوئی۔ یہ واقعہ اُس وقت سامنے آیا جب دونوں کھلاڑیاں صبح پانچ بجے ہونے والی روزانہ کی ٹریننگ میں شریک نہ ہوئیں۔ اگرچہ دونوں کو الگ الگ کمروں میں ٹھہرایا گیا تھا، تاہم بدھ کی رات 15 سالہ کھلاڑی نے 17 سالہ کھلاڑی کے کمرے میں قیام کیا تھا۔
پولیس کمشنر کرن نارائنن کے مطابق جب کمرہ کھولا گیا تو وہاں سے ایک سوسائیڈ نوٹ برآمد ہوا، جس میں صرف اپنی جان لینے پر معذرت کا اظہار کیا گیا تھا، تاہم کسی واضح وجہ کا ذکر موجود نہیں تھا۔
پولیس نے واقعے کی تحقیقات شروع کر دی ہیں ۔ مزید تفتیش کے لیے دیگر زیرِ تربیت کھلاڑیوں، کوچز اور اہلِ خانہ کے بیانات بھی ریکارڈ کیے جا رہے ہیں
