پولیو خاتمہ پروگرام کے مطابق، اگرچہ سال کی آخری پولیو مہم کے دوران تقریبا آٹھ لاکھ بچے ویکسین سے محروم رہ گئے، تاہم 2025 میں پاکستان نے پولیو وائرس کے خلاف جدوجہد میں نمایاں پیش رفت کی ہے۔
پولیو پروگرام کے جاری کردہ بیان کے مطابق، سال کے دوران پولیو ویکسینیشن کی چھ مہمات چلائی گئیں، جن میں سے پانچ ملک گیر سطح پر تھیں۔ ان مہمات کے نتیجے میں پولیو کیسز کی تعداد میں نمایاں کمی واقع ہوئی اور 2024 میں رپورٹ ہونے والے 74 کیسز کے مقابلے میں 2025 میں یہ تعداد کم ہو کر 30 رہ گئی، جبکہ ستمبر کے بعد ملک کے کسی حصے سے کوئی نیا کیس رپورٹ نہیں ہوا۔
واضح رہے کہ آخری ملک گیر پولیو مہم کا ہدف 45.4 ملین بچوں کو ویکسین پلانا تھا، تاہم ملک بھر میں انکار کے واقعات کے باعث 44.6 ملین بچوں کو ہی قطرے پلائے جا سکے۔ پولیو پروگرام کے بیان میں کہا گیا کہ اگرچہ کیسز کی تعداد میں کمی آئی ہے، لیکن پولیو کے مکمل خاتمے تک پاکستان کی جدوجہد جاری رہے گی۔ وائرس اب بھی بعض ہائی رسک علاقوں میں موجود ہے، جس کے باعث مسلسل نگرانی انتہائی ضروری ہے۔
بیان میں زور دیا گیا کہ رہ جانے والے بچوں تک پہنچنے اور کسی ممکنہ دوبارہ پھیلاؤ کو روکنے کے لیے ہدفی اقدامات، مؤثر کمیونٹی رابطہ کاری اور مسلسل ویکسینیشن ناگزیر ہیں۔ فرنٹ لائن ہیلتھ ورکرز، سکیورٹی ادارے اور مقامی انتظامیہ باہمی تعاون سے کام کر رہے ہیں تاکہ آبادی میں مدافعت کی سطح بلند رکھی جا سکے اور پاکستان کو پولیو فری بنانے کی راہ پر گامزن رکھا جائے۔
پولیو پروگرام کے مطابق، 15 سے 21 دسمبر کے دوران ہونے والی تازہ ترین قومی پولیو مہم میں قومی سطح پر 98 فیصد سے زائد کوریج حاصل کی گئی، جبکہ چاروں صوبوں، آزاد جموں و کشمیر، گلگت بلتستان اور اسلام آباد میں بھی کارکردگی حوصلہ افزا رہی۔ گزشتہ مہم کے مقابلے میں رہ جانے والے بچوں کی تعداد میں 18 فیصد کمی ریکارڈ کی گئی، خاص طور پر جنوبی خیبرپختونخوا میں رسائی اور انتظامی کارکردگی میں نمایاں بہتری آئی
