پاکستان کے بانی قائداعظم محمد علی جناح کے 149ویں یومِ پیدائش کے موقع پر سول و عسکری قیادت نے ایک خودمختار، جمہوری اور سب کو ساتھ لے کر چلنے والی ریاست کے ان کے وژن کو خراجِ تحسین پیش کرتے ہوئے اس سے وابستگی کا اعادہ کیا۔
آج کےدن کا آغاز وفاقی دارالحکومت اسلام آباد میں 31 اور صوبائی دارالحکومتوں میں 21 توپوں کی سلامی سے ہوا۔ فجر کے بعد ملک بھر کی مساجد میں قائداعظم، قومی امن، خوشحالی اور ترقی کے لیے خصوصی دعائیں کی گئیں، جبکہ کراچی میں مزارِ قائد پر گارڈز کی تبدیلی کی پروقار تقریب منعقد ہوئی۔
وزیراعظم شہباز شریف نے اپنے پیغام میں کہا کہ یہ دن قائداعظم کے رہنما اصولوں، جمہوریت، آئین کی بالادستی، سماجی انصاف، مذہبی ہم آہنگی، مساوات اور قانون کی حکمرانی پر مبنی فلاحی ریاست کے وژن سے وابستگی کی تجدید کا موقع فراہم کرتا ہے۔ انہوں نے کہا کہ ایمان، اتحاد اور نظم و ضبط کے لازوال اصول ہماری قومی طاقت کی بنیاد اور آئندہ نسلوں کے لیے مشعلِ راہ ہیں۔
وزیراعظم نے قائداعظم کو ایک دوراندیش رہنما اور عالمی سطح کے مدبر سیاستدان قرار دیتے ہوئے کہا کہ ان کی سیاسی بصیرت، غیر متزلزل عزم اور بے لوث جدوجہد نے تاریخ کا دھارا موڑا اور برصغیر کے مسلمانوں کے لیے ایک آزاد وطن کے قیام کو ممکن بنایا۔ انہوں نے پاکستان کے وقار، سلامتی، ترقی اور خوشحالی کے لیے قائداعظم کی وراثت کو آگے بڑھانے کے عزم کا اعادہ کیا۔
صدر آصف علی زرداری نے بھی قائداعظم کی قیادت کی اہمیت پر زور دیتے ہوئے قوم سے جمہوری اور جامع اقدار کے ساتھ وابستگی کی تجدید کی اپیل کی۔ ان کا کہنا تھا کہ قائداعظم کی قیادت، وژن اور اصول آج کے چیلنجز میں بھی قوم کی رہنمائی کرتے ہیں، جبکہ جمہوریت، انصاف اور مساوات ہماری قومی سمت کا مرکز ہونا چاہئیں اور اداروں و فیصلوں کی بنیاد بننے چاہئیں۔
صدر مملکت نے اتحاد، ایمان اور نظم و ضبط کو ترقی، سماجی ہم آہنگی اور قومی اعتماد کے لیے ناگزیر قرار دیا اور نوجوانوں پر زور دیا کہ وہ قائداعظم کے نظریات کو اپنائیں۔ انہوں نے بتایا کہ آئندہ سال قائداعظم کے 150ویں یومِ پیدائش کے پیشِ نظر حکومت 2026 کو یومِ قائداعظم کا سال قرار دے گی تاکہ ان کی زندگی، جدوجہد اور وژن پر بامعنی غور کیا جا سکے اور ان کے اصول نئی نسل تک منتقل ہوں۔
عسکری قیادت نے بھی قائداعظم کو خراجِ عقیدت پیش کیا۔ پاکستانی فوج کے شعبہ تعلقات عامہ آئی ایس پی آر کے مطابق چیف آف ڈیفنس فورسز اور آرمی چیف فیلڈ مارشل عاصم منیر، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے بانیٔ پاکستان کی خدمات کو سراہا۔ بیان میں کہا گیا کہ مسلح افواج ایمان، اتحاد اور نظم و ضبط کے اصولوں پر قائم ایک مضبوط، خودمختار، جمہوری اور خوشحال پاکستان کے قائداعظم کے وژن سے اپنی غیر متزلزل وابستگی کا اعادہ کرتی ہیں۔
بیان میں اس عزم کا اظہار بھی کیا گیا کہ مسلح افواج ملک کی خودمختاری اور علاقائی سالمیت کے تحفظ کے ساتھ ساتھ قومی استحکام، امن اور ترقی میں اپنا بھرپور کردار ادا کرتی رہیں گی
