لیونل میسی نے ورلڈکپ فائنل میں اسپین کے ہاتھوں شکست کے بعد ارجنٹینا کے مداحوں کا شکریہ ادا کیا ہے اور کہا ہے کہ اس ناکامی کا دکھ بہت بڑا ہے۔
ارجنٹینا کو اتوار کو نیویارک نیو جرسی اسٹیڈیم میں کھیلے گئے فائنل میں اسپین نے 0-1 سے شکست دی تھی۔ یہ میچ ممکنہ طور پر میسی کا آخری ورلڈکپ میچ ہو سکتا ہے، تاہم انہوں نے اس بارے میں کوئی واضح اعلان نہیں کیا۔
میسی فائنل کے بعد میدان میں آبدیدہ نظر آئے، کیونکہ ارجنٹینا کے پاس یہ مسلسل دوسری بار ورلڈکپ جیتنے کا موقع تھا۔
انسٹاگرام پر اپنے پیغام میں میسی نے لکھا کہ درد بہت زیادہ ہے اور اس زخم کو بھرنے میں وقت لگے گا۔ انہوں نے کہا کہ اس مایوسی کے باوجود وہ ان اچھے لمحات کو یاد رکھیں گے، جن میں ارجنٹینا نے مشکل میچز میں کم بیک کیا اور پورے ملک کو ایک بار پھر متحد کیا۔
میسی کے مطابق ابھی اس کامیابی کو پوری طرح سمجھنا مشکل ہے، مگر یہ حقیقت اہم ہے کہ ارجنٹینا مسلسل 2 ورلڈکپ فائنلز تک پہنچا۔
ارجنٹینا نے 2022 کے فائنل میں فرانس کو پنالٹیز پر شکست دے کر ٹرافی جیتی تھی۔
2026 کے ورلڈکپ میں بھی ارجنٹینا مضبوط ٹیموں میں شامل رہی اور سیمی فائنل میں انگلینڈ کے خلاف کم بیک کرتے ہوئے فائنل تک پہنچی۔ تاہم فائنل میں اسپین کے مضبوط دفاع نے ارجنٹینا کو گول پر ایک بھی شاٹ نہیں لینے دیا۔
میسی نے اپنے پیغام میں ارجنٹینا کے مداحوں کا شکریہ ادا کرتے ہوئے کہا کہ ایک بار پھر پورا ملک ایک ساتھ کھڑا ہوا اور ارجنٹینی ہونے کا فخر محسوس کیا۔ انہوں نے اسپین کو ورلڈکپ جیتنے پر مبارک باد بھی دی۔
میسی نے اس ورلڈکپ کے دوران میروسلاو کلوزے کا 16 ورلڈکپ گولز کا ریکارڈ توڑا اور مجموعی طور پر 21 گولز تک پہنچے۔ تاہم فرانس کے کائلین ایمباپے نے انہیں پیچھے چھوڑتے ہوئے ورلڈکپ میں اپنے گولز کی تعداد 22 کر لی۔
ایمباپے نے اس ورلڈکپ میں 10 گولز کے ساتھ گولڈن بوٹ بھی جیتی، جبکہ میسی 8 گولز کے ساتھ اس دوڑ میں دوسرے نمبر پر رہے۔
میسی اس ٹورنامنٹ کے دوران 39 سال کے ہو گئے تھے اور 2030 کے ورلڈکپ تک ان کی عمر 43 سال ہو جائے گی۔ اسی وجہ سے فائنل کے بعد یہ سوال مزید اہم ہو گیا ہے کہ آیا دنیا نے میسی کو آخری بار ورلڈکپ میں کھیلتے دیکھا ہے۔
رپورٹس کے مطابق میسی اور ان کے ارجنٹینی ساتھی روڈریگو ڈی پال اب کچھ میچز کے لیے آرام کریں گے اور انٹر میامی کے اگلے 2 لیگ میچز میں شامل نہیں ہوں گے۔
