ازبکستان کی حکومت یکم جولائی 2026 سے ایک نئی ڈیجیٹل مالیاتی پلیٹ فارم متعارف کروا رہی ہے جس کا مقصد کاروباری افراد، خصوصاً چھوٹے اور درمیانے درجے کے کاروباروں کو قرضوں اور مالی معاونت تک آسان رسائی فراہم کرنا ہے۔
حکومتی فیصلے کے مطابق اس پلیٹ فارم کے ذریعے کاروباری افراد ایک ہی آن لائن نظام پر قرض کی درخواست جمع کرا سکیں گے اور مختلف تجارتی بینکوں کی جانب سے پیش کی جانے والی مالیاتی سہولیات کا موازنہ بھی کر سکیں گے۔ حکام کے مطابق اس اقدام سے قرض کے حصول کے عمل میں آسانی پیدا ہوگی، غیر ضروری دفتری رکاوٹیں کم ہوں گی اور بینکوں کے درمیان مسابقت میں اضافہ ہوگا۔
نئے نظام کے تحت مصنوعی ذہانت (اے آئی) پر مبنی مشاورتی خدمات بھی فراہم کی جائیں گی۔ تجارتی بینک مقامی علاقوں کی معاشی ضروریات اور ترقی کے امکانات کو مدنظر رکھتے ہوئے کاروباری افراد کو نئے کاروباری منصوبوں اور مواقع سے متعلق تجاویز دیں گے۔
ازبکستان کی معیشت میں چھوٹے کاروبار اہم کردار ادا کرتے ہیں۔ سرکاری اعداد و شمار کے مطابق یہ شعبہ ملکی مجموعی قومی پیداوار کا نصف سے زیادہ حصہ فراہم کرتا ہے جبکہ ملک کی اکثریتی افرادی قوت بھی اسی شعبے سے وابستہ ہے۔
