ازبکستان نے ایران کے ساتھ صحت اور طبی شعبے میں تعاون بڑھانے کے لیے دوطرفہ منصوبے پر عمل درآمد کی آمادگی ظاہر کی ہے۔
ایران کے سرکاری خبر رساں ادارے ارنا کے مطابق تاشقند میں ایرانی سفیر محمد علی اسکندری نے ازبکستان کے وزیر صحت الدار عادیلوف سے ملاقات کی۔
ملاقات کے دوران ایرانی سفیر نے صحت، طبی تعلیم، ادویات کی تیاری، طبی آلات کی پیداوار اور غیر ملکی مریضوں کو علاج کی سہولیات فراہم کرنے کے شعبوں میں ایران کی صلاحیتوں سے آگاہ کیا۔
ازبک وزیر صحت نے ایران کی جانب سے تعاون کی پیشکش کا خیرمقدم کرتے ہوئے دونوں ممالک کے درمیان طے شدہ روڈ میپ پر عمل درآمد کے لیے آمادگی ظاہر کی۔
دونوں فریقوں نے طبی اور سائنسی اداروں کے درمیان روابط بڑھانے، ادویات اور طبی آلات کی تیاری میں مشترکہ منصوبے شروع کرنے اور سرمایہ کاری کے امکانات پر بھی تبادلہ خیال کیا۔
ملاقات میں ایران کے طبی تجربے سے استفادہ کرنے اور صحت کے شعبے میں طویل مدتی تعاون کو فروغ دینے پر اتفاق کیا گیا۔
