ازبکستان اور چین کے درمیان سیاحت کے شعبے میں تعاون کے فروغ کے لیے ایک مشترکہ فورم کا انعقاد کیا گیا، جس میں دونوں ممالک کے سیاحتی شعبے کے نمائندوں، سرمایہ کاروں، ہوٹل آپریٹرز اور متعلقہ اداروں نے شرکت کی۔
فورم میں دنیا کے معروف ہوٹل آپریٹرز میں شمار ہونے والے تین بڑے بین الاقوامی ہوٹل گروپس کے نمائندے بھی شریک ہوئے۔
ازبکستان کی سیاحتی کمیٹی کے نائب چیئرمین سنجر تاجییف نے شرکا سے خطاب کرتے ہوئے کہا کہ دونوں ممالک کے درمیان ویزا فری نظام کے نفاذ سے دوطرفہ تعلقات مزید مضبوط ہوئے ہیں۔
ان کے مطابق 2025 میں دو لاکھ 78 ہزار سے زائد چینی شہریوں نے ازبکستان کا دورہ کیا، جبکہ 2026 کے پہلے پانچ ماہ کے دوران ایک لاکھ 78 ہزار سے زیادہ چینی سیاح ازبکستان پہنچے۔
فورم کے دوران جمہوریہ قراقلپاقستان، سرخان دریا، قشقہ دریا اور نمنگان کے سیاحتی اور سرمایہ کاری مواقع پر بریفنگ دی گئی۔ چینی ثقافتی مرکز اور آرگائل ہوٹلز گروپ کے نمائندوں نے بھی اپنی تجاویز اور منصوبے پیش کیے۔
چینی وفد نے فورم سے قبل تاشقند اور اس کے نواحی علاقوں میں سیاحتی اور ہوٹلنگ کے بنیادی ڈھانچے کا جائزہ لیا اور ازبک مارکیٹ میں بین الاقوامی برانڈز کے فروغ کے امکانات پر غور کیا۔
بی ٹو بی ملاقاتوں میں ہوٹلنگ، مذہبی سیاحت، ماحولیاتی سیاحت، غذائی سیاحت اور صحت و فلاح سے متعلق سیاحت کے شعبوں میں تعاون اور مشترکہ سرمایہ کاری منصوبوں پر تبادلہ خیال کیا گیا۔
فورم کے اختتام پر دونوں ممالک کے شراکت داروں نے سیاحت کی صنعت کے فروغ اور کاروباری روابط کو مضبوط بنانے کے لیے تعاون کی پانچ یادداشتوں پر دستخط کیے۔
