اسلام آباد میں ازبک سفیر علی شیر تختیوف نے بدھ کے روز ایوانِ صدر میں صدر آصف علی زرداری سے ملاقات کی۔
ملاقات کے دوران صدر نے کہا کہ پاکستان ازبکستان کے ساتھ اپنے برادرانہ تعلقات کو انتہائی اہمیت دیتا ہے، جو مشترکہ تاریخ، ثقافت اور باہمی اعتماد پر مبنی ہیں۔ انہوں نے دوطرفہ تعلقات میں مثبت پیش رفت کو سراہتے ہوئے ازبکستان کے صدر شوکت مرزائیوف کے لیے نیک خواہشات کا اظہار کیا۔
صدر زرداری نے تجارت کے فروغ پر زور دیتے ہوئے کہا کہ دونوں ممالک کو تجارت میں تنوع، منڈیوں تک بہتر رسائی اور تجارتی سہولت کے نظام کو جلد فعال بنانے کی ضرورت ہے۔ انہوں نے کاروباری روابط اور اہم شعبوں میں سرمایہ کاری بڑھانے کی بھی حوصلہ افزائی کی۔
انہوں نے کہا کہ علاقائی اقتصادی انضمام کے لیے رابطہ سازی کلیدی حیثیت رکھتی ہے، اور پاکستان گوادر اور کراچی بندرگاہوں کے ذریعے گرم پانیوں تک مختصر ترین راستہ فراہم کرتا ہے۔ صدر نے ٹرانس افغان ریلوے منصوبے کی جلد تکمیل کی حمایت بھی دہرائی۔
اس موقع پر سفیر نے پرتپاک استقبال پر صدر کا شکریہ ادا کیا اور پاکستان کے ساتھ تعلقات مزید مضبوط بنانے کے عزم کا اعادہ کیا۔ انہوں نے تجارت، سرمایہ کاری اور رابطہ سازی کے شعبوں میں تعاون بڑھانے میں ازبکستان کی دلچسپی کا اظہار کیا اور خطے میں امن و استحکام کے فروغ میں پاکستان کے کردار کو سراہا۔
سفیر نے ازبکستان کے صدر کی جانب سے صدر زرداری کو دورۂ ازبکستان کی دعوت بھی یاد دلائی، جس پر صدر نے رواں سال اس دورے کی تیاریوں کو حتمی شکل دینے کی ہدایت کی۔
