انسانوں کی شادیوں کے بعد اب روبوٹس کی شادی بھی موضوعِ بحث بن گئی ہے۔ روس کے دارالحکومت ماسکو میں دو انسان نما روبوٹس، رابرٹ اور میٹلڈا کی ایک منفرد تقریب منعقد ہوئی، جس کی ویڈیو سوشل میڈیا پر وائرل ہو گئی۔
یہ تقریب ماسکو کی مشہور پشکن لائبریری میں منعقد ہوئی، جہاں دونوں روبوٹس کو روایتی انداز میں ایک دوسرے کے سامنے کھڑا کیا گیا۔ تقریب کے دوران رابرٹ اور میٹلڈا نے پہلے سے پروگرام کیے گئے شادی کے وعدے کیے اور علامتی طور پر شادی کے بریسلٹس کا تبادلہ بھی کیا۔
روبوٹ دلہا رابرٹ کو دفتری ملازم اور مواد تخلیق کرنے والے روبوٹ کے طور پر پیش کیا گیا، جبکہ روبوٹ دلہن میٹلڈا کو ایک روبوٹ رقاصہ بتایا گیا۔
تقریب کا سب سے منفرد لمحہ اس وقت آیا جب ایک روبوٹ کتا، جس کا نام ڈاگمیٹک تھا، شادی کے بریسلٹس لے کر تقریب میں پہنچا۔
تاہم یہ کوئی قانونی شادی نہیں تھی اور نہ ہی اس کا مطلب یہ ہے کہ روبوٹس انسانوں کی طرح جذبات یا محبت محسوس کرنے لگے ہیں۔ یہ دراصل ایک علامتی اور نمائشی تقریب تھی، جس کا مقصد انسان نما روبوٹس کے بڑھتے ہوئے کردار کو دکھانا تھا۔
ماہرین کے مطابق مصنوعی ذہانت اور روبوٹکس کی تیز رفتار ترقی کے باعث روبوٹس مستقبل میں انسانی زندگی کے مزید شعبوں میں شامل ہو سکتے ہیں، تاہم جذبات اور شعور کے حوالے سے انسان اور مشین کے درمیان فرق بدستور موجود ہے۔
