پاکستان ویمنز کرکٹ ٹیم نے ایشین گیمز کے کوارٹر فائنل میں تھائی لینڈ کو سنسنی خیز مقابلے کے بعد تین وکٹوں سے شکست دے کر سیمی فائنل میں جگہ بنا لی۔ میچ جاپان کے شہر نِشِن کے ’کوروگی اسپورٹس پارک‘ میں کھیلا گیا، جہاں مقابلہ بارش کے باعث 11، 11 اوورز تک محدود کر دیا گیا تھا۔
پاکستان نے ٹاس جیت کر تھائی لینڈ کو پہلے بیٹنگ کی دعوت دی۔ تھائی ٹیم نے مقررہ 11 اوورز میں 91 رنز بنائے۔ ناناپت کونچاروئنکائی نے 49 رنز کی نمایاں اننگز کھیلی، جبکہ پاکستانی کپتان فاطمہ ثنا نے تین اوورز میں 22 رنز دے کر دو وکٹیں حاصل کیں۔
92 رنز کے ہدف کے تعاقب میں پاکستان کو شوال ذوالفقار اور گل فیروزہ نے اچھا آغاز فراہم کیا۔ شوال نے 14 گیندوں پر 25 رنز بنائے، تاہم ان کے آؤٹ ہونے کے بعد پاکستانی بیٹنگ لائن دباؤ کا شکار ہو گئی اور تھائی لینڈ نے صرف 13 گیندوں کے دوران چار وکٹیں حاصل کر کے میچ میں واپسی کی۔
کپتان فاطمہ ثنا نے مشکل صورتحال میں 13 گیندوں پر 21 رنز کی اہم اننگز کھیل کر پاکستان کو دوبارہ مقابلے میں واپس لایا۔ آخری اوورز میں طوبیٰ حسن نے ایک چھکا اور چوکا لگا کر ہدف کو مزید آسان کیا، جبکہ ام ہانی اور ایمان ناصر نے پاکستان کو دو گیندیں باقی رہتے فتح دلا دی۔ پاکستان نے ہدف سات وکٹوں کے نقصان پر حاصل کیا۔
پاکستان اب 20 ستمبر کو سیمی فائنل میں ملائیشیا اور سری لنکا کے درمیان ہونے والے کوارٹر فائنل کی فاتح ٹیم کا سامنا کرے گا۔ دوسرے سیمی فائنل کے لیے بنگلہ دیش پہلے ہی کوالیفائی کر چکا ہے، کیونکہ چین کے خلاف اس کا کوارٹر فائنل بارش کے باعث بغیر کسی گیند کے منسوخ ہو گیا اور بہتر سیڈنگ کی بنیاد پر بنگلہ دیش کو اگلے مرحلے میں جگہ مل گئی۔
ایشین گیمز ویمنز کرکٹ مقابلوں کے سیمی فائنلز 20 ستمبر جبکہ گولڈ اور برانز میڈل کے میچز 22 ستمبر کو کھیلے جائیں گے۔ پاکستان کی قیادت فاطمہ ثنا کر رہی ہیں، جو ایشین گیمز کی افتتاحی تقریب میں پاکستان کی پرچم بردار بھی مقرر کی گئی ہیں۔
