ازبکستان کے صدر شوکت مرزائیوف نے ملک میں جدید اور برآمدی بنیادوں پر قائم باغبانی کے فروغ کیلئے نئی مراعات اور مالی سہولتوں کا اعلان کیا ہے۔
صدارتی دفتر کے مطابق حکومت “ایگرو اسٹار” نامی کمپنی کے حصص کاروباری افراد کو سات سالہ مدت میں مرحلہ وار خریدنے کی اجازت دے گی، جبکہ اس دوران کمپنی کی مالیت کا دوبارہ تعین نہیں کیا جائے گا۔
یہ اعلان صدر مرزائیوف کی زیرِ صدارت ہونے والے ایک اجلاس میں کیا گیا، جس میں ملک بھر میں جدید اور برآمدی نوعیت کی باغبانی کو تیزی سے فروغ دینے پر غور کیا گیا۔
منصوبے کے تحت بینک فی ایکڑ 120 ملین سوم (تقریباً 10 ہزار ڈالر) تک رعایتی قرض فراہم کریں گے۔ قرض کی بروقت ادائیگی کی صورت میں سود کا 50 فیصد حصہ حکومت ادا کرے گی۔
اس کے علاوہ باغات کی دیکھ بھال کیلئے تین سال تک فی ایکڑ 50 لاکھ سوم کی سرکاری سبسڈی بھی دی جائے گی۔
حکام کے مطابق کاروباری افراد کو اسلامی مالیاتی نظام کے تحت پانی بچانے والی ٹیکنالوجی، پھلوں کے پودے اور زرعی مشینری خریدنے کی سہولت بھی فراہم کی جائے گی تاکہ زرعی شعبے کی پیداوار اور پائیداری میں بہتری لائی جا سکے۔
