برطانوی میڈیا ریگولیٹری ادارے آف کام نے سوشل میڈیا پلیٹ فارمز کو غیر قانونی مواد سے متعلق خطرے کا جائزہ رپورٹ جمع کرانے کی ڈیڈ لائن دے دی۔
آف کام نے پیر کے روز سوشل میڈیا اور دیگر آن لائن پلیٹ فارمز کو 31 مارچ تک یہ ڈیڈ لائن دی ہے کہ وہ اپنے پلیٹ فارمز پر صارفین کے غیر قانونی مواد سے دوچار ہونے کے امکانات سے متعلق خطرے کا جائزہ پیش کریں۔
گزشتہ سال منظور ہونے والے نئے قوانین کے تحت میٹا (فیس بک اور انسٹاگرام) اور بائٹ ڈانس (ٹک ٹاک) جیسی کمپنیوں کے لیے اپنے پلیٹ فارمز پر مجرمانہ سرگرمیوں کے خلاف کارروائی کرنے اور انہیں محفوظ بنانا ضروری ہے۔
آن لائن سیفٹی ایکٹ کے تحت، کمپنیوں کو اپنے پلیٹ فارمز پر ہونے والے جرائم کی وسیع رینج کے خطرات کا جائزہ لینا اور ان کو کم کرنا ہوگا، جس میں دہشت گردی، نفرت انگیز جرائم، بچوں کے جنسی استحصال اور مالیاتی فراڈ شامل ہیں۔
آف کام نے ایک بیان میں کہا ہے کہ خاص طور پر، انہیں یہ طے کرنا ہوگا کہ ان کی سروس پر صارفین کے غیر قانونی مواد سے دوچار ہونے کا کتنا امکان ہے۔آف کام نے خبردار کیا ہے کہ اگر مقررہ ڈیڈ لائن تک جائزہ جمع نہ کرایا گیا تو ان کے خلاف قانونی کارروائی کی جا سکتی ہے۔
اس اقدام کا مقصد آن لائن پلیٹ فارمز کو جوابدہ بنانا اور صارفین، خاص طور پر بچوں اور نوجوانوں کو آن لائن نقصان سے بچانا ہے۔ آف کام کے اس فیصلے سے سوشل میڈیا کمپنیوں پر دباؤ بڑھے گا کہ وہ اپنے پلیٹ فارمز پر موجود غیر قانونی مواد کو کنٹرول کرنے کے لیے موثر اقدامات کریں۔
