دن کا آغاز ایک ایسا ناشتہ کرنے سے ہونا چاہیے جو آپ کو سیر بھی کرے اور توانائی بھی دے۔ لیکن اتنے زیادہ آپشنز کے ساتھ یہ فیصلہ کرنا مشکل ہو سکتا ہے کہ کیا کھایا جائے۔
ایک مشہور امریکی ہیلتھ ویب سائٹ نے دو مشہور، تیز اور پیٹ بھرنے والے ناشتوں کا تقابلی جائزہ لیا ہے تاکہ یہ جان سکیں کہ کون سا زیادہ صحت بخش ہے:
1 کپ ٹوسٹڈ اوٹس سیریل + 1/2 کپ کم چکنائی والا دودھ (2%)
یا
2 سلائسز مکمل اناج والے (ہول ویٹ)ٹوسٹ + 2 چمچ پی نٹ بٹر یعنی مونگ پھلی کا مکھن
فیصلہ: فاتح — مونگ پھلی کا مکھن اور مکمل اناج والا ٹوسٹ فاتح رہا۔
دونوں آپشنز صحت بخش ہیں، لیکن مونگ پھلی کے مکھن والا ٹوسٹ غذائیت اور دیرپا توانائی کے لحاظ سے ہلکی سی برتری رکھتا ہے۔
وجہ کیا ہے؟
1. دیرپا توانائی (Staying Power)
مونگ پھلی کے مکھن والے ناشتے میں تقریباً 16.5 گرام صحت مند چکنائی (زیادہ تر مونو سیچوریٹڈ فیٹ) ہوتی ہے۔
اس کے مقابلے میں سیریل اور دودھ کے ناشتے میں مجموعی طور پر صرف 4 گرام چکنائی ہوتی ہے۔
چکنائی جسم کو دیر تک توانائی فراہم کرتی ہے، اور جب آپ مونگ پھلی کے مکھن کو مکمل اناج کے ساتھ کھاتے ہیں تو آپ کو پروٹین اور فائبر بھی ملتے ہیں—جو صبح کے وقت سیر اور توانائی کے لیے بہترین ہیں۔
2. سیریل میں اضافی وٹامنز اور منرلز
اگرچہ سیریل اور دودھ والا ناشتہ بھی صحت بخش ہے، لیکن اس کا ایک فائدہ یہ ہے کہ یہ کیلشیم اور وٹامن D مہیا کرتا ہے—دو غذائی اجزاء جن کی کمی اکثر امریکی غذا میں پائی جاتی ہے:
سیریل + دودھ = تقریباً 247 ملی گرام کیلشیم (یعنی روزانہ کی ضرورت کا تقریباً 20%)
مونگ پھلی کا مکھن + ٹوسٹ = تقریباً 81 ملی گرام کیلشیم
اسی طرح، دودھ اور سیریل میں موجود وٹامن D بھی جسم کے لیے فائدہ مند ہے۔
مشورہ: اگر آپ مونگ پھلی کے مکھن والے ناشتے کے ساتھ ایک کپ دودھ بھی پی لیں، تو آپ نہ صرف سیر ہوں گے بلکہ کیلشیم اور وٹامن D کی مقدار میں بھی سیریل سے آگے نکل جائیں گے۔
اگر آپ سیریل پسند کرتے ہیں، تو…
ایسا سیریل منتخب کریں جس میں زیادہ فائبر اور کم چینی ہو۔
اس میں کچھ بیریز یا کیلا شامل کر لیں تاکہ مزید غذائیت حاصل ہو۔
خلاصہ:
اگر آپ ایسا ناشتہ چاہتے ہیں جو آپ کو زیادہ دیر تک سیر رکھے اور توانائی دے، تو مونگ پھلی کا مکھن اور مکمل اناج والا ٹوسٹ بہتر انتخاب ہے—خصوصاً اس میں موجود صحت مند چکنائیوں کی وجہ سے۔
اگر آپ اس میں کیلے کے ٹکڑے اور تھوڑا دارچینی پاوڈر چھڑک کر اوپر سے ایک گلاس دودھ پی لیں، تو یہ ناشتہ غذائیت سے بھرپور، سیر حاصل اور متوازن بن جائے گا۔
نوٹ: پی نٹ بٹر پاکستان میں عام دستیاب ہے، امپورٹڈ بھی مل جاتے ہیں، مگر مایونیز بنانے والی پاکستانی کمپنیاں جیسے ینگ بھی پی نٹ بٹر بناتی ہیں جو کہ زیادہ مہنگا نہیں۔
