روزانہ تھوڑی سی مقدار کھانے سے کھانے کی خواہش کم ہوتی ہے اور میٹابولک صحت بہتر ہوتی ہے
اندرونی چربی کو کم کرنے پر توجہ دینے سے نہ صرف آپ کی صحت طویل عرصے تک محفوظ رہتی ہے بلکہ آپ کا جسم بھی سڈول رہتا ہے۔ جسم کے اندرونی اعضاء کے گرد جمع ہونے والی اس چربی کا تعلق دل کی بیماریوں، ٹائپ ٹو ذیابیطس اور دیگر دائمی امراض کے بڑھتے ہوئے خطرے سے ہے۔ ویب سائٹ’’ Eating Well ‘‘ کے مطابق روزانہ مٹھی بھر بادام کھانے سے اس میں حقیقی فرق آ سکتا ہے۔
ماہرِ غذائیات سٹیسی لوفٹن کہتی ہیں کہ بادام غذائی اجزاء سے بھرپور ہوتے ہیں جن میں دل کے لیے صحت مند چربی، پودوں سے حاصل ہونے والا پروٹین اور فائبر شامل ہیں۔ یہ بادام پیٹ کو زیادہ دیر تک بھرا ہوا محسوس کرانے میں مدد کرتے ہیں اور جسم خاص طور پر کمر کے گرد چربی جمع ہونے کے طریقے پر اثر انداز ہوتے ہیں۔ بادام جسم کی صحت مند ساخت کو سہارا دے سکتا ہے اور اس کے فوائد کے پیچھے درج ذیل غذائی اجزاء کارفرما ہیں۔
پیٹ بھرا ہوا محسوس ہونا
بادام پیٹ بھرنے کا احساس پیدا کرتا ہے، یعنی وہ پیٹ بھرنے کا احساس جو بھوک کو قابو کرنے اور زیادہ کھانے سے روکنے میں مدد کرتا ہے، اس طرح یہ اندرونی چربی کو کم کرنے میں مدد کرتا ہے۔ اس کی بڑی وجہ اس میں موجود فائبر، پروٹین اور چربی ہے۔ یہ تمام غذائی اجزاء ہاضمے کے عمل کو سست کرتے ہیں اور دماغ کو یہ پیغام دیتے ہیں کہ آپ نے کافی کھا لیا ہے۔ لوفٹن کا کہنا ہے کہ تقریباً 28 گرام بادام میں تقریباً 6 گرام پروٹین اور 3 گرام فائبر ہوتا ہے ۔ یہ دونوں بھرپور غذائی اجزاء ہیں جو پیٹ کو بھرا رکھتے ہیں اور خون میں شکر کی سطح کو مستحکم رکھتے ہیں۔
خون میں شوگر کی سطح کا استحکام
انسولین مزاحمت اس میں اہم کردار ادا کرتی ہے کہ اندرونی چربی جسم کے اعضاء کے گرد کیسے جمع ہوتی ہے۔ بادام میں غیر سیر شدہ چکنائی، میگنیشیم اور وٹامن ای اور پولیفینول جیسے اینٹی آکسیڈنٹس ہوتے ہیں جو سب مل کر انسولین کی حساسیت کو بہتر بنانے اور خون میں شکر کی سطح کو منظم کرنے میں مدد کرتے ہیں۔ تحقیق سے پتہ چلتا ہے کہ بادام کا استعمال گلوکوز میٹابولزم پر مثبت اثر ڈالتا ہے۔
لوفٹن کہتی ہیں کہ میگنیشیم سیکڑوں میٹابولک عمل میں شامل ہوتا ہے۔ اس سے جسم گلوکوز اور انسولین سے کس طرح نمٹتا ہے۔ بادام اس کا ایک بہترین ذریعہ ہے۔ ایک مٹھی بھر میں روزانہ کی ضرورت کا تقریباً 20 فیصد حصہ موجود ہوتا ہے۔ ماہرِ غذائیات ایرن گوئٹ نے تصدیق کی ہے کہ بادام کا فائبر اور صحت مند چربی ہاضمے کو سست کرتی ہے اور انسولین کی سطح میں اضافے کو کم کرتی ہے اور یہ میٹابولک صحت کے لیے بہت ضروری ہے۔
کم چربی کا جذب ہونا
نظریاتی طور پر بادام کیلوریز سے بھرپور ہوتے ہیں لیکن ان کی تمام کیلوریز جسم کے لیے دستیاب نہیں ہوتیں۔ ان کی ساخت ہضم ہونا مشکل بناتی ہے۔ یہ اس کے لیے اچھی خبر ہے جو اندرونی چربی کم کرنے کی کوشش کر رہا ہے اور ساتھ ہی پیٹ کو بھرا اور سیر شدہ بھی رکھنا چاہتا ہے۔ 2023 کی ایک سائنسی تحقیق میں یہ انکشاف ہوا تھا کہ پورے بادام کی میٹابولک توانائی غذائی لیبل پر بتائی گئی مقدار سے تقریباً 20 سے 25 فیصد کم ہوتی ہے۔ لوفٹن کا کہنا ہے کہ ایک متوازن خوراک میں بادام کو شامل کرنے سے میٹابولک صحت کو سہارا ملتا ہے۔ انسولین کی حساسیت بہتر ہوتی ہے اور یہ وزن کو منظم کرنے کی ایک کامیاب حکمت عملی کا حصہ ہو سکتا ہے۔
آکسیڈیٹیو تناؤ میں کمی
بادام صرف فائبر، پروٹین اور صحت مند چربی ہی فراہم نہیں کرتے بلکہ یہ اینٹی آکسیڈنٹس سے بھی بھرپور ہوتے ہیں جن میں سوزش کے خلاف خصوصیات ہوتی ہیں۔ گوئٹ وضاحت کرتی ہیں کہ “بادام میں موجود وٹامن ای اور پولیفینول سوزش اور آکسیڈیٹیو تناؤ سے لڑنے میں مدد کرتے ہیں۔ یہ مرکبات آزاد ریڈیکلز کو بے اثر کرنے میں مدد کرتے ہیں جو خلیوں کو نقصان پہنچا سکتے ہیں اور دائمی سوزش کو فروغ دے سکتے ہیں۔
