بالی ووڈ اداکار اکشے کھنہ نے فلم دھرندھر کی کامیابی کے بعد ممبئی کے مہنگے ترین رہائشی علاقوں میں شمار ہونے والے مالابار ہل میں 33 کروڑ 26 لاکھ بھارتی روپے مالیت کا لگژری اپارٹمنٹ خرید لیا ہے۔ بھارتی اخبار انڈین ایکسپریس کے مطابق یہ خریداری ستمبر 2026 میں کی گئی۔
رپورٹ کے مطابق جائیداد کی رجسٹریشن سے متعلق دستاویزات سے معلوم ہوا ہے کہ اکشے کھنہ کا نیا گھر مالابار ہل روڈ پر واقع 30 لٹل گبز نامی عمارت میں ہے۔ اپارٹمنٹ کا اندرونی قابلِ استعمال رقبہ تقریباً 2 ہزار 341 مربع فٹ ہے، جبکہ بالکونی کو شامل کرنے کے بعد مجموعی رقبہ تقریباً 2 ہزار 517 مربع فٹ بنتا ہے۔
نئے اپارٹمنٹ کے ساتھ 3 گاڑیوں کی پارکنگ کی سہولت بھی شامل ہے۔ جائیداد کی خریداری پر تقریباً 1 کروڑ 99 لاکھ روپے اسٹامپ ڈیوٹی ادا کی گئی، جبکہ رجسٹریشن فیس 30 ہزار روپے رہی۔
مالابار ہل جنوبی ممبئی کے مہنگے اور نمایاں رہائشی علاقوں میں شمار ہوتا ہے۔ یہاں جائیدادوں کی قیمتیں شہر کے بیشتر علاقوں کے مقابلے میں کافی زیادہ ہیں اور کئی معروف کاروباری اور فلمی شخصیات بھی اس علاقے میں رہائش یا جائیداد رکھتی ہیں۔ موجودہ اعداد و شمار کے مطابق یہاں رہائشی جائیدادوں کی اوسط طلبی قیمت تقریباً 85 ہزار روپے فی مربع فٹ کے آس پاس ہے۔
اکشے کھنہ نے فلم دھرندھر کے دونوں حصوں میں منفی کردار ادا کیا تھا، جبکہ فلم میں رنویر سنگھ نے مرکزی کردار نبھایا۔ رپورٹ کے مطابق دونوں حصوں نے مجموعی طور پر دنیا بھر میں 3 ہزار 203 کروڑ روپے سے زیادہ کا کاروبار کیا۔
اکشے کھنہ حال ہی میں عدالتی موضوع پر بننے والی فلم اکّا میں بھی نظر آئے، جس میں انہوں نے تقریباً 28 برس بعد سنی دیول کے ساتھ کام کیا۔ ان کی آئندہ فلم مہاکالی ہے، جس میں وہ شکر اچاریہ کا کردار ادا کریں گے۔ فلم 8 جنوری 2027 کو سینما گھروں میں پیش کیے جانے کا منصوبہ ہے۔
