ازبکستان کے تاریخی شہر خیوہ میں چوتھے بین الاقوامی بخشی آرٹ فیسٹیول کا باقاعدہ آغاز ہو گیا، جس میں دنیا کے چالیس سے زائد ممالک سے تقریباً 200 نمائندگان شریک ہوئے۔
فیسٹیول کے تحت ترک دنیا کے ثقافتی فورم کا دوسرا اجلاس اور بین الاقوامی سائنسی و عملی کانفرنس بعنوان “نئے ازبکستان میں بخشی آرٹ: عصری تحقیق اور امکانات” بھی منعقد ہوئی۔
ان تقاریب میں TURKSOY کے سیکریٹری جنرل سلطان رائف، ترک ثقافت و ورثہ فاؤنڈیشن کی صدر اکتوتی رئیمکولوفا، ترک پارلیمانی اسمبلی (TURKPA) کے سیکریٹری جنرل محمت سوریہ ایر، ترک اکیڈمی کے صدر شاہین مصطفییف، آذربائیجان کے وزیر ثقافت عادل کریملی اور کرغیزستان کی نائب وزیر ثقافت گل بارہ عبدالقلیقوفا سمیت کئی اعلیٰ شخصیات نے شرکت کی۔
فیسٹیول میں فولکلور ماہرین، جامعات اور تحقیقی اداروں کے محققین، اور بخشی آرٹ و زبانی روایات سے دلچسپی رکھنے والے سکالرز شریک ہوئے۔
بخشی آرٹ ایک قدیم، ہمہ وقتی اور عوامی فن ہے جو ہزاروں سال سے جاری ہے۔ یہ کسی بھی قوم کی تاریخ، ثقافت، داستانوں اور قومی شناخت کا مظہر ہوتا ہے اور اس کی بقا اور فروغ میں اہم کردار ادا کرتا ہے۔
آذربائیجان کے وزیر ثقافت عادل کریملی نے کہا: “یہ فیسٹیول 2019 سے ازبک قومی بخشی آرٹ کی ترویج، نوجوان نسل میں اس فن کے لیے احترام پیدا کرنے، اقوامِ عالم کے مابین دوستی کو فروغ دینے اور عالمی سطح پر ثقافتی و تخلیقی تعاون کو وسعت دینے کے لیے منعقد کیا جا رہا ہے۔”
سیکریٹری جنرل سلطان رائف نے کہا “حالیہ برسوں میں صدر ازبکستان کی قیادت میں بخشی، مقام اور لزگی جیسے ثقافتی فنون کو بھرپور ترقی دی جا رہی ہے۔ ازبکستان میں تیسرا ثقافتی نشاۃ ثانیہ (Renaissance) شروع ہو چکا ہے۔ یہ ملک دنیا میں ثقافتوں کو جوڑنے والا ایک نمایاں خطہ بنتا جا رہا ہے۔”
فیسٹیول کے دوران منعقدہ سائنسی و عملی کانفرنس کے اختتام پر بخشی آرٹ کے مستقبل کے امکانات سے متعلق ایک اہم قرارداد بھی منظور کی گئی۔
