بالوں کی سفیدی ایک قدرتی عمل ہے جو عمر کے ساتھ ساتھ ہوتا ہے، لیکن اگر یہ جوانی میں ہی ظاہر ہونے لگے تو یہ تشویش کا باعث بن جاتا ہے۔ لوگ اس مسئلے کو حل کرنے کے لیے مختلف ادویات، تیل اور گھریلو نسخے آزماتے ہیں، لیکن اصل میں ایک متوازن اور غذائیت سے بھرپور خوراک بالوں کی صحت کو برقرار رکھنے میں بنیادی کردار ادا کرتی ہے۔
معروف ڈرماٹولوجسٹ ڈاکٹر کاشف احمد ملک کے مطابق، بالوں کی سفیدی کی دو بڑی وجوہات ہوتی ہیں۔ پہلی جینیاتی اثرات، یعنی اگر خاندان میں بال وقت سے پہلے سفید ہونے کی روایت ہو تو یہ آپ میں بھی منتقل ہو سکتی ہے۔ دوسری بڑی وجہ جسم میں زنک اور کاپر کی کمی ہے، جو بالوں کی رنگت کے لیے ضروری عناصر ہیں۔
بالوں کی سفیدی روکنے کے لیے ایک متوازن غذا کا استعمال بہت ضروری ہے۔ ڈاکٹر کاشف کے مطابق چقندر، کلیجی، ساگ، لوبیا، دالیں، دہی، دودھ اور مچھلی بہترین "ہیئر فوڈ” سمجھی جاتی ہیں، کیونکہ ان میں قدرتی طور پر زنک اور کاپر وافر مقدار میں موجود ہوتا ہے، جو بالوں کو صحت مند اور قدرتی رنگت میں رکھنے میں مدد دیتا ہے۔ سی فوڈ کا استعمال بھی فائدہ مند ثابت ہو سکتا ہے کیونکہ مچھلی اور دیگر سمندری خوراک وٹامن بی-12، اومیگا تھری، اور دیگر ضروری غذائی اجزاء فراہم کرتی ہیں جو بالوں کی نشوونما کے لیے ضروری ہیں۔
وٹامن بی-6، بی-12، بایوٹین، وٹامن ڈی اور وٹامن ای کی کمی بھی قبل از وقت بال سفید ہونے کی ایک بڑی وجہ ہو سکتی ہے، اس لیے ان وٹامنز کا مناسب استعمال ضروری ہے۔ ذہنی دباؤ (اسٹریس) بھی بالوں کی سفیدی کو تیز کرنے کی ایک اہم وجہ ہے۔ زیادہ تر جسمانی بیماریوں کی بنیادی جڑ ذہنی دباؤ ہوتا ہے، اس لیے ضروری ہے کہ روزمرہ کی زندگی میں ذہنی سکون کو برقرار رکھا جائے۔
خوراک میں توازن رکھتے ہوئے اومیگا تھری سپلیمنٹس کا استعمال معالج کے مشورے سے کیا جا سکتا ہے۔ موسمی سبزیوں اور پھلوں کو خوراک کا حصہ بنایا جائے تاکہ جسم کو تمام ضروری غذائی اجزاء مل سکیں۔ مصنوعی پروڈکٹس اور کیمیکل والے ہیئر کلرز کے زیادہ استعمال سے پرہیز کرنا بھی بالوں کی صحت کے لیے ضروری ہے، کیونکہ یہ بالوں کو مزید نقصان پہنچا سکتے ہیں۔
اگر ان غذائی ہدایات پر عمل کیا جائے اور صحت مند طرزِ زندگی اپنایا جائے تو بالوں کی قبل از وقت سفیدی کو روکا جا سکتا ہے اور قدرتی رنگت کو برقرار رکھا جا سکتا ہے۔
