ازبکستان کا دارالحکومت تاشقند 8 سے 10 اکتوبر تک سوئمنگ ورلڈ کپ کے ایک مرحلے کی میزبانی کرے گا۔ یہ مقابلہ 2026 ورلڈ ایکواٹکس کے عالمی کیلنڈر کا حصہ ہے۔
یہ ایونٹ بین الاقوامی ’’سلک روڈ‘‘ سیریز کا دوسرا مرحلہ ہوگا، جبکہ ازبکستان پہلی مرتبہ اس سطح کے ایکواٹکس مقابلے کی میزبانی کرے گا۔
تاشقند میں ہونے والے مقابلے کو دسمبر میں چین کے دارالحکومت بیجنگ میں منعقد ہونے والی ورلڈ ایکواٹکس سوئمنگ چیمپئن شپ شارٹ کورس، 25 میٹر سے قبل کھلاڑیوں اور کوچز کی تیاری کے آخری مرحلے کے طور پر بھی دیکھا جا رہا ہے۔
منتظمین کے مطابق مقابلے میں امریکا، یورپ، ایشیا اور افریقہ سے 400 سے زائد کھلاڑی، کوچز اور کھیلوں کے عہدیدار شرکت کریں گے۔
ازبکستان میں پہلی بار عالمی سطح کے اس ایکواٹکس ایونٹ کا انعقاد ملک میں تیراکی کے کھیل کے فروغ اور بین الاقوامی مقابلوں کی میزبانی کے حوالے سے بھی اہم پیش رفت قرار دیا جا رہا ہے۔
