بھارتی سپریم کورٹ نے سنبھل میں شاہی مسجد کے تنازعے پر مقامی عدالتوں کو کارروائی روکنے کا حکم دے دیا ہے۔
بھارتی میڈیا کے مطابق، مسجد کمیٹی نے مقامی عدالت کے سروے کے حکم کو چیلنج کرتے ہوئے سپریم کورٹ سے رجوع کیا تھا۔ سپریم کورٹ نے حکم دیتے ہوئے کہا کہ مسجد کمیٹی کو اپنے قانونی حقوق کے استعمال کا موقع دیا جانا چاہیے۔ عدالت نے یہ بھی واضح کیا کہ امن و امان کی بحالی اس معاملے میں اولین ترجیح ہے۔
نماز جمعہ کے موقع پر ممکنہ کشیدگی کے پیش نظر علاقے میں سخت حفاظتی انتظامات کیے گئے۔ پولیس اور انتظامیہ نے اضافی فورس تعینات کرکے صورتحال کو قابو میں رکھنے کی کوشش کی۔
واضح رہے کہ سنبھل میں شاہی مسجد کی جگہ مندر کے دعوے پر کیے گئے سروے کے بعد علاقے میں شدید کشیدگی دیکھی گئی، جس کے نتیجے میں پانچ افراد ہلاک ہوگئے تھے۔
یہ معاملہ بھارت میں مذہبی تناؤ کی ایک اور مثال بن کر سامنے آیا ہے، جس پر سپریم کورٹ نے مداخلت کرتے ہوئے حالات کو سنبھالنے کی کوشش کی ہے۔
