ازبکستان اور افغانستان کے نجی شعبوں کے درمیان 520 ملین ڈالر مالیت کے ایک بڑے تجارتی معاہدے پر دستخط کیے گئے ہیں۔
افغانستان کی وزارتِ صنعت و تجارت کے مطابق یہ مفاہمتی یادداشت افغانستان کے نجی شعبے اور ازبکستان کے علاقے اندیجان کے کاروباری نمائندوں کے درمیان طے پائی۔
معاہدے کے تحت دونوں ممالک کے درمیان مختلف صنعتی اور زرعی منصوبوں پر تعاون کیا جائے گا، جن میں لوہے کی پگھلائی، سیمنٹ کی پیداوار، کپاس کی پروسیسنگ اور پولٹری فارمنگ جیسے شعبے شامل ہیں۔
اس کے علاوہ افغانستان سے ازبکستان کو کوئلے کی برآمد، انڈوں کی پیداوار اور گاڑیوں کے اسپیئر پارٹس کی تیاری کے منصوبے بھی اس معاہدے کا حصہ ہیں۔
یہ معاہدہ افغانستان کے وزیرِ صنعت و تجارت نورالدین عزیزی اور ازبکستان کے اندیجان ریجن کے گورنر شوکتبیک عبد الرحمانوف کی موجودگی میں ہوا۔
اس سے قبل بھی دونوں ممالک کے نجی شعبوں کے درمیان 514 ملین ڈالر سے زائد مالیت کا ایک اور معاہدہ طے پا چکا ہے، جس سے ظاہر ہوتا ہے کہ کابل اور تاشقند کے درمیان اقتصادی تعاون میں مسلسل اضافہ ہو رہا ہے۔
