پاکستانی فوج کے فیلڈ مارشل اور چیف آف ڈیفنس فوسرز جنرل سید عاصم منیرنے راولپنڈی کے کرسٹ چرچ میں کرسمس کی تقریبات میں شرکت کی اور مسیحی برادری کے ساتھ خوشیوں کے اس موقع کو منایا۔ انہوں نے مسیحی برادری کو کرسمس کی دلی مبارکباد پیش کرتے ہوئے امن، ہم آہنگی اور خوشحالی کے لیے نیک تمناؤں کا اظہار کیا۔
فیلڈ مارشل نے بانی پاکستان قائد اعظم محمد علی جناح کو خراجِ عقیدت پیش کرتے ہوئے ان کے مساوات، آزادی اور مذہبی رواداری کے وژن کو اجاگر کیا اور کہا کہ اقلیتوں کے حقوق کا تحفظ پاکستان کے نظریے کی بنیادہے۔ انہوں نے اس بات پر زور دیا کہ پاکستان میں تمام شہریوں کو برابر کے حقوق حاصل ہیں۔
چرچ میں موجود افراد سے گفتگو کرتے ہوئے فیلڈ مارشل عاصم منیر نے قومی ترقی اور سلامتی میں پاکستانی مسیحیوں کی نمایاں خدمات کو سراہا اور کہا کہ مسیحی برادری نے نسل در نسل پاکستان مسلح افواج میں قابلِ فخر اور امتیازی خدمات انجام دی ہیں۔ انہوں نے بین المذاہب ہم آہنگی، باہمی احترام اور اتحاد کی اہمیت پر زور دیتے ہوئے کہا کہ پاکستان کی اصل طاقت تنوع، مساوی مواقع اور آئین میں درج مشترکہ اقدار میں مضمر ہے، جو مذہب، نسل، ذات اور عقیدے سے بالاتر ہیں۔
فیلڈ مارشل نے آئینِ پاکستان کے تحت تمام شہریوں کے وقار، سلامتی اور مساوی حقوق کے تحفظ کے لیے پاکستان مسلح افواج کے عزم کا اعادہ کیا۔ اس موقع پر مسیحی برادری کے رہنماؤں نے فیلڈ مارشل کے دورے پر شکریہ ادا کرتے ہوئے ملکی دفاع، شمولیت، مذہبی ہم آہنگی اور قومی یکجہتی کے فروغ میں پاک فوج کے کردار کو سراہا
