پاکستان اور ازبکستان کے درمیان تجارتی اور غذائی تعاون کو فروغ دینے کی جانب ایک اہم پیش رفت کے طور پر پہلی چارٹر کارگو پرواز کامیابی سے مکمل کر لی گئی ہے۔
12 مارچ کو لاہور سے روانہ ہونے والا بوئنگ 737 طیارہ مقامی وقت کے مطابق رات 9 بج کر 10 منٹ پر تاشقند بین الاقوامی ہوائی اڈے پر اترا۔ اس پرواز کے ذریعے خوراک کی پہلی کھیپ، جس میں 17 ٹن گوشت شامل تھا، ازبکستان پہنچائی گئی۔
حکام کے مطابق یہ پرواز دونوں ممالک کے درمیان لاجسٹکس اور تجارتی روابط کو مضبوط بنانے کی جانب ایک عملی قدم ہے۔ منصوبے کے تحت مستقبل میں کارگو ترسیل کے حجم میں بتدریج اضافہ کیا جائے گا اور ایک پرواز کے ذریعے 100 ٹن تک سامان منتقل کرنے کا ہدف رکھا گیا ہے۔
یہ پہلی کارگو پرواز پاکستانی ایئرلائن ایئر ایگل کی ایئر اسپیڈ چارٹر تھی۔ کمپنی کا کہنا ہے کہ آئندہ زیادہ گنجائش کے ساتھ مزید کارگو پروازیں شروع کرنے کا منصوبہ ہے۔
ماہرین کے مطابق یہ پیش رفت پاکستان اور ازبکستان کے درمیان اقتصادی تعاون کی بڑھتی ہوئی صلاحیت کو ظاہر کرتی ہے اور اس سے وسطی ایشیا اور جنوبی ایشیا کے درمیان تجارت، غذائی تحفظ اور ٹرانسپورٹ روابط کو فروغ ملنے کی توقع ہے۔
