دنیا کے بیشتر ممالک میں یہ حقیقت تسلیم شدہ ہے کہ خواتین کی اوسط عمر مردوں کے مقابلے میں زیادہ ہوتی ہے۔ مختلف تحقیقی رپورٹس کے مطابق خواتین عام طور پر مردوں سے 5 سے 8 سال زیادہ زندگی گزارتی ہیں۔ ماہرین کا کہنا ہے کہ اس فرق کی وجوہات محض طرزِ زندگی تک محدود نہیں بلکہ اس کے پیچھے جینیاتی خصوصیات، قوتِ مدافعت، ہارمونز اور سماجی رویے جیسے متعدد عوامل شامل ہیں۔
طبی ماہرین کا کہنا ہے کہ خواتین کے جسم میں موجود ایسٹروجن ہارمون نہ صرف دل کی بیماریوں کے خدشے کو کم کرتا ہے بلکہ خون کی شریانوں کو لچکدار بھی رکھتا ہے۔ یہی وجہ ہے کہ خواتین میں دل کے امراض نسبتاً دیر سے سامنے آتے ہیں۔ دوسری جانب مردوں میں ٹیسٹوسٹیرون کی مقدار زیادہ ہوتی ہے جو انہیں خطرات مول لینے پر مجبور کرتا ہے، یہی وجہ ہے کہ حادثات اور جسمانی تنازعات میں مردوں کی اموات زیادہ دیکھی جاتی ہیں۔
طرزِ زندگی کے فرق کو بھی ماہرین خواتین کی طویل عمر کی ایک اہم وجہ قرار دیتے ہیں۔ عالمی رپورٹس بتاتی ہیں کہ مردوں میں تمباکو نوشی، شراب نوشی اور غیر متوازن خوراک کے استعمال کی شرح زیادہ ہوتی ہے جبکہ خواتین عام طور پر صحت کا زیادہ خیال رکھتی ہیں اور باقاعدگی سے طبی معائنہ بھی کراتی ہیں۔ اس کے نتیجے میں خواتین عمر کے بڑھنے کے باوجود بہتر صحت برقرار رکھنے میں کامیاب رہتی ہیں۔
ماہرین کے مطابق خواتین کا مدافعتی نظام بھی مردوں کے مقابلے میں زیادہ مستحکم ہوتا ہے۔ متعدد تحقیقوں سے ثابت ہوا ہے کہ خواتین کا جسم وائرس اور جراثیم کے خلاف زیادہ مؤثر ردعمل ظاہر کرتا ہے، جس کی بنا پر وہ مختلف امراض سے جلد صحت یاب ہو جاتی ہیں۔
نفسیاتی ماہرین کا کہنا ہے کہ جذبات کے اظہار کی صلاحیت انسانی صحت پر براہِ راست اثر ڈالتی ہے۔ خواتین عام طور پر اپنے جذبات اور احساسات دوسروں کے ساتھ شیئر کرتی ہیں، جس سے ان میں ذہنی تناؤ کم رہتا ہے، جبکہ اکثر مرد جذبات دبانے کی کوشش کرتے ہیں جس کا نتیجہ ذہنی دباؤ، ہارٹ اٹیک یا ڈپریشن کی صورت میں نکل سکتا ہے۔
سماجی سطح پر بھی خواتین کی زندگی نسبتاً زیادہ متوازن سمجھی جاتی ہے۔ وہ خاندان اور تعلقات میں جڑی رہتی ہیں جس سے انہیں جذباتی سہارا ملتا ہے، جبکہ مردوں میں تنہائی اور ذہنی دباؤ کی شرح زیادہ پائی جاتی ہے جو عمر کے کم ہونے کا سبب بنتا ہے۔
تحقیقی ماہرین کا کہنا ہے کہ اگرچہ خواتین کی طویل عمر کے کئی حیاتیاتی اور سماجی عوامل ہیں، لیکن صحت مند زندگی گزارنے کے لیے دونوں جنسوں کے لیے ضروری ہے کہ وہ جسمانی اور ذہنی صحت پر یکساں توجہ دیں
