پاکستان کرکٹ بورڈ (پی سی بی) نے اعلان کیا ہے کہ ایچ بی ایل پاکستان سپر لیگ (پی ایس ایل) 10 کے باقی آٹھ میچز اب متحدہ عرب امارات (یو اے ای) میں کھیلے جائیں گے۔ بورڈ کے مطابق غیر ملکی کھلاڑی آج یعنی جمعے کے روز دبئی روانہ ہو رہے ہیں۔
پی سی بی نے جاری کردہ باضابطہ بیان میں تصدیق کی کہ لیگ کے آخری مرحلے کو راولپنڈی، ملتان اور لاہور سے متحدہ عرب امارات منتقل کرنے کا فیصلہ کر لیا گیا ہے۔ نئی تاریخوں اور وینیوز کے ساتھ ایک نیا شیڈول جلد جاری کیا جائے گا۔
پی سی بی کے چیئرمین محسن نقوی نے اس فیصلے کی وضاحت کرتے ہوئے کہا کہ یہ قدم “راولپنڈی کرکٹ اسٹیڈیم کو نشانہ بنانے والے ایک انتہائی غیر ذمہ دارانہ اور خطرناک بھارتی اقدام” کے جواب میں اٹھایا گیا ہے۔ محسن نقوی کا کہنا تھا، “یہ عمل واضح طور پر جاری ایچ بی ایل پاکستان سپر لیگ 10 کو متاثر کرنے کے لیے کیا گیا تھا۔”
انہوں نے کہا کہ کھلاڑیوں کی حفاظت اور ذہنی سکون پی سی بی کی اولین ترجیح ہے، اور اسی لیے یہ قدم اٹھایا گیا ہے۔ “ایک ذمہ دار ادارے کے طور پر، جو کئی بار مشکلات سے گزر چکا ہے، ہمارے لیے ضروری تھا کہ ہم کرکٹ کے مفادات کا تحفظ کریں اور اس لیگ کے تسلسل کو یقینی بنائیں،” ۔
اب یو اے ای میں کھیلے جانے والے میچز میں شامل ہیں:
کراچی کنگز بمقابلہ پشاور زلمی
پشاور زلمی بمقابلہ لاہور قلندرز
اسلام آباد یونائیٹڈ بمقابلہ کراچی کنگز
ملتان سلطانز بمقابلہ کوئٹہ گلیڈی ایٹرز
کوالیفائر
الیمنیٹر 1
الیمنیٹر 2
فائنل
پی سی بی نے تمام اسٹیک ہولڈرز سے اپیل کی ہے کہ وہ بورڈ کے ساتھ کھڑے رہیں تاکہ لیگ کو کامیابی سے مکمل کیا جا سکے۔
