بھارتی شوبز انڈسٹری کے ایک ابھرتے ہوئے اور مقبول گلوکار ہیومنے ساگر صرف 36 سال کی عمر میں وفات پا گئے۔ وہ اپنی موسیقی اور کامیابیوں کے عروج کی جانب تیزی سے گامزن تھے، تاہم اچانک ان کی زندگی کا سفر اختتام کو پہنچ گیا۔
میڈیا رپورٹس کے مطابق، ہیومنے ساگر کے جگر میں شدید خرابی پیدا ہو چکی تھی، جس کے باعث ان کے دیگر اعضا بھی متاثر ہو رہے تھے۔ وہ مسلسل کمزوری اور نقاہت کا شکار تھے۔ ان کے اہل خانہ نے بتایا کہ گلوکار کو تین دن قبل طبیعت بگڑنے پر اسپتال کے انتہائی نگہداشت کے وارڈ میں داخل کرایا گیا تھا، جہاں ڈاکٹروں نے ہر ممکن کوشش کی، لیکن وہ دوران علاج چل بسے۔
ہیومنے ساگر نے اپنی آبائی ریاست اوڈیشہ کے معروف ٹی وی میوزیکل مقابلے میں کامیابی حاصل کی، جس کے بعد ان کی شہرت بھارت بھر میں پھیل گئی۔ اس کے بعد انہوں نے ٹی وی پروگرامز کے ذریعے اپنی موسیقی کے جوہر دکھائے اور فلموں کے لیے گانے بھی شروع کیے، جس نے انہیں ایک پہچان دلائی۔
ہیومنے ساگر کی اچانک وفات نے شوبز انڈسٹری اور مداحوں کو دلی صدمے میں مبتلا کر دیا ہے۔ ان کے مداح اور شوبز شخصیات انہیں یاد کرتے رہیں گے، اور ان کی موسیقی ہمیشہ لوگوں کے دلوں میں زندہ رہے گی
