امریکی سینٹرز فار ڈیزیز کنٹرول اینڈ پریونشن (CDC) کی تازہ تحقیق نے والدین کے لیے خوش آئند خبر دی ہے کہ بچوں کو دی جانے والی ویکسینز مرگی (Epilepsy) کے خطرے کو بڑھانے کا سبب نہیں بنتیں۔ اس تحقیق نے ایک بار پھر واضح کر دیا کہ ویکسینز بچوں کی صحت کے لیے محفوظ اور ضروری ہیں، اور انہیں روکنے یا ملتوی کرنے کی کوئی ضرورت نہیں۔
تحقیق میں 1 سے 4 سال کے 2,089 بچوں کو شامل کیا گیا جنہیں مرگی کی تشخیص تھی۔ ان بچوں کا موازنہ 20,139 ایسے بچوں سے کیا گیا جنہیں یہ بیماری نہیں تھی۔ اس بڑے اور جامع مطالعے سے یہ بات سامنے آئی کہ بچوں کی ویکسینیشن کی حالت یا ویکسین میں موجود ایلومینیم کا مرگی یا کسی اور نیورولوجیکل بیماری کے خطرے سے کوئی تعلق نہیں۔
ویکسینز میں استعمال ہونے والا ایلومینیم ایک adjuvant کے طور پر شامل کیا جاتا ہے تاکہ ویکسین کے اثرات مضبوط ہوں۔ ماضی میں بعض افواہوں اور غلط معلومات کی بنیاد پر والدین میں خدشات پیدا ہوئے تھے کہ ایلومینیم بچوں میں نیورولوجیکل مسائل پیدا کر سکتا ہے۔ تاہم اس تحقیق کے نتائج نے یہ تمام خدشات دور کر دیے ہیں اور واضح کیا ہے کہ ایلومینیم کی موجودگی مرگی کے امکانات کو نہیں بڑھاتی۔
مطالعے کے دوران زیادہ تر بچے 12 سے 23 ماہ کے درمیان تھے اور 54 فیصد بچے لڑکے تھے۔ تحقیق میں یہ بھی دیکھا گیا کہ بچوں کے ویکسینیشن شیڈول پر عمل کرنے سے نہ صرف ان کی جسمانی صحت مضبوط رہتی ہے بلکہ ان کی نیورولوجیکل نشوونما پر بھی کوئی منفی اثر نہیں پڑتا۔
ماہرین کا کہنا ہے کہ یہ تحقیق والدین کے لیے نہایت اہم ہے، کیونکہ یہ ویکسین کے حوالے سے پھیلی ہوئی افواہوں اور غلط فہمیوں کو ختم کرتی ہے۔ اس کے ذریعے والدین کو یقین دہانی ملتی ہے کہ وہ اپنے بچوں کی ویکسینیشن جاری رکھیں اور بچوں کی بیماریوں سے بچاؤ کو یقینی بنائیں
