اپریل 2025ء میں ازبکستان نے پہلی بار ایک ماہ کے دوران 10 لاکھ سے زائد غیر ملکی سیاحوں کا خیرمقدم کیا، جو کہ ملکی سیاحت کی تاریخ کا ایک نیا سنگ میل ہے۔ یہ غیر معمولی کامیابی ملک میں سیاحت کے شعبے میں جاری اصلاحات اور بین الاقوامی تعاون کو بڑھانے کی کاوشوں کا نتیجہ ہے۔
ازبکستان میں سیاحت کے فروغ کے لیے صدر شوکت مرزائیوف کی حکومت نے کئی اہم اقدامات کیے ہیں۔ صدارتی فرمانوں اور قراردادوں کے ذریعے سیاحت کو ایک اسٹریٹجک صنعت کے طور پر مضبوط بنانے، سرمایہ کاری کو فروغ دینے، ویزا فری پالیسی کو مزید وسعت دینے اور عالمی سیاحتی میلوں اور فورمز میں بھرپور شرکت کو یقینی بنایا گیا ہے۔ ان اقدامات نے نہ صرف ازبکستان کے سیاحتی مقامات کی عالمی سطح پر پہچان بڑھائی ہے بلکہ غیر ملکی سیاحوں کے اعتماد میں بھی اضافہ کیا ہے۔
ازبکستان کی سیاحتی کمیٹی نے مستقبل کے لیے کئی اہم اہداف طے کیے ہیں، جن میں بین الاقوامی معیار کے مطابق سیاحتی خدمات کی فراہمی، سیاحتی مقامات کی ماحولیاتی پائیداری کو یقینی بنانا، اور ازبکستان کی عالمی سیاحتی مارکیٹ میں مسابقت بڑھانا شامل ہے۔
ماہرین کا کہنا ہے کہ ازبکستان نے حالیہ برسوں میں اپنے ثقافتی ورثے، تاریخی مقامات اور قدرتی خوبصورتیوں کو عالمی سطح پر متعارف کرانے میں نمایاں کامیابیاں حاصل کی ہیں، جس سے سیاحت کی صنعت میں بے پناہ ترقی ممکن ہوئی ہے۔ اس کے علاوہ جدید ٹیکنالوجی، ڈیجیٹل ٹرانسفارمیشن اور سیاحوں کی آسانی کے لیے انفراسٹرکچر میں بہتری بھی اس کامیابی کا اہم حصہ ہیں۔
یہ پیش رفت نہ صرف ملکی معیشت کے لیے فائدہ مند ہے بلکہ ازبکستان کو عالمی سیاحتی نقشے پر ایک نمایاں مقام دلانے میں بھی اہم کردار ادا کر رہی ہے
