پاکستان اور سعودی عرب نے حج 2025 کے لیے معاہدہ کر لیا ہے، جس کے تحت ایک لاکھ 79 ہزار 210 پاکستانی عازمین فریضہ حج ادا کریں گے۔ وفاقی وزیر چوہدری سالک اور سعودی وزیر حج ڈاکٹر توفیق الربیعہ نے اس معاہدے پر دستخط کیے۔
سعودی وزارت حج کے مطابق، پاکستانی عازمین کو بہتر سہولیات فراہم کرنے پر اتفاق کیا گیا ہے۔ حج کو آسان اور آرام دہ بنانے کے لیے 20 سے 25 دن کا مختصر حج پروگرام متعارف کرایا گیا ہے، جس میں پاکستانی حجاج کے لیے منیٰ میں خصوصی جگہ مختص کی جائے گی اور نرخ بھی کم ہوں گے۔
عازمین کو مدینہ منورہ میں 4 سے 8 دن کے قیام کا انتخاب کرنے کی سہولت دی جائے گی۔ زائرین کو ایک بیگ فراہم کیا جائے گا جس میں پاکستانی پرچم اور شناخت کے لیے کیو آر کوڈ شامل ہوگا۔
سعودی وزارت حج نے بتایا کہ عازمین حج کو تمام معلومات خصوصی موبائل ایپ کے ذریعے دستیاب ہوں گی۔
