ازبکستان کے تاریخی شہر بخارا میں روایتی موسیقی اور ثقافتی ورثے کو اجاگر کرنے کے لیے ’’بخورو دائرہ صادولاری‘‘ میلے کا انعقاد کیا گیا، جہاں فنکاروں نے دائرہ بجانے کے فن کا مظاہرہ کرکے قدیم موسیقی کی روایات کو نئی نسل کے سامنے پیش کیا۔
غیر مادی ثقافتی ورثے کے عالمی دن کے موقع پر منعقد ہونے والے اس میلے کا مقصد ازبکستان کی روایتی موسیقی کو فروغ دینا اور نوجوانوں میں اس فن سے دلچسپی پیدا کرنا تھا۔
کوک الداش مدرسے میں ہونے والی تقریب میں بخارا ریجن کے نامور دائرہ نوازوں اور موسیقی کے مختلف گروپس نے شرکت کی۔ فنکاروں نے دائرہ کی مخصوص آواز، اس کے ذریعے مختلف جذبات کے اظہار اور اپنی فنی مہارت کا مظاہرہ کیا، جس سے ازبکستان کی موسیقی کی قدیم روایات کی خوب صورتی نمایاں ہوئی۔
میلے میں فعال طور پر حصہ لینے والے دائرہ نوازوں اور فنکارانہ گروپس کو علاقائی انتظامیہ کی جانب سے تعریفی اسناد اور تحائف بھی دیے گئے۔ اس اقدام کا مقصد روایتی فنون سے وابستہ فنکاروں کی خدمات کو سراہنا اور ثقافتی ورثے کے تحفظ کے لیے ان کی حوصلہ افزائی کرنا تھا۔
یہ میلہ بخارا کی ثقافتی شناخت کو نمایاں کرنے اور روایتی موسیقی کو نئی نسل تک منتقل کرنے کی کوششوں کا حصہ ہے۔
