ٹک ٹاک اور اس کی چینی ملکیتی کمپنی بائٹ ڈانس نے امریکی ریاست الاباما کے ساتھ ایک اہم قانونی معاہدہ کر لیا ہے، جس کے تحت کم عمر صارفین کے لیے روزانہ استعمال کی حد، عمر کی سخت تصدیق اور والدین کے لیے مزید کنٹرول متعارف کرائے جائیں گے۔ یہ ٹک ٹاک کا کم عمر صارفین کی حفاظت سے متعلق کسی امریکی ریاست کے ساتھ پہلا ایسا تصفیہ ہے۔
الاباما کے اٹارنی جنرل کے دفتر کے مطابق معاہدے کے تحت ٹک ٹاک ریاست کو کم از کم 10 کروڑ ڈالر ادا کرے گا۔ مخصوص شرائط پوری ہونے کی صورت میں یہ رقم بڑھ کر 30 کروڑ ڈالر تک پہنچ سکتی ہے۔
معاہدے کے تحت کم عمر صارفین کے لیے ٹک ٹاک کے روزانہ استعمال کی حد دو گھنٹے مقرر ہوگی۔ مسلسل 15 منٹ استعمال کے بعد وقفے کا پیغام دیا جائے گا، جبکہ 60 اور 90 منٹ کے بعد بھی مزید وقفے شامل کیے جائیں گے تاکہ مسلسل اسکرولنگ کم کی جا سکے۔
اس کے علاوہ رات 12 بجے سے صبح 6 بجے تک کم عمر صارفین کی رسائی محدود ہوگی، جبکہ رات اور اسکول کے اوقات میں پیغامات اور اطلاعات پر بھی پابندیاں عائد کی جائیں گی۔ صارفین کی عمر کی بہتر تصدیق کے لیے نئے اقدامات اور والدین کے لیے زیادہ مضبوط نگرانی کے اختیارات بھی فراہم کیے جائیں گے۔
معاہدے میں کم عمر صارفین کے اکاؤنٹس کو بالغ افراد کی جانب سے تلاش کیے جانے کو محدود کرنے، مشکوک رابطوں پر والدین کو اطلاع دینے، نوعمر صارفین کے لیے خوبصورتی تبدیل کرنے والے فلٹرز پر پابندی اور ان کے لیے پہلے سے غیر شخصی مواد دکھانے کی شرط بھی شامل ہے۔
الاباما نے گزشتہ سال ٹک ٹاک کے خلاف مقدمہ دائر کرتے ہوئے الزام لگایا تھا کہ اس کا نظام نوجوانوں کو مسلسل ویڈیوز دیکھنے کی طرف راغب کرتا ہے اور بعض صورتوں میں تشدد، خود کو نقصان پہنچانے اور دیگر نقصان دہ مواد کی طرف لے جا سکتا ہے۔ ریاست نے یہ بھی الزام عائد کیا تھا کہ کمپنی نے کم عمر صارفین کے لیے اپنی حفاظت سے متعلق اقدامات کو بڑھا چڑھا کر پیش کیا۔ ٹک ٹاک نے کہا ہے کہ نوجوانوں کی حفاظت اس کی بنیادی ترجیحات میں شامل ہے۔
یہ مقدمہ پیر سے الاباما کی عدالت میں شروع ہونا تھا، تاہم مقدمے سے چند روز قبل فریقین کے درمیان معاہدہ طے پا گیا۔ الاباما کے علاوہ کم از کم 27 دیگر امریکی ریاستوں اور واشنگٹن ڈی سی میں بھی ٹک ٹاک کو نوجوانوں کی ذہنی صحت اور پلیٹ فارم کے استعمال سے متعلق قانونی مقدمات کا سامنا ہے۔
