بالی ووڈ کے لیجنڈ اداکار امیتابھ بچن نے اپنی زندگی کی ایک ایسی خواہش کا ذکر کیا ہے جو تقریباً چھ دہائیوں پر محیط کامیاب فلمی کیریئر کے باوجود پوری نہیں ہو سکی۔ اداکار کا کہنا ہے کہ انھیں آج بھی اس بات کا افسوس ہے کہ وہ کبھی کوئی موسیقی کا ساز بجانا نہیں سیکھ سکے۔
امیتابھ بچن نے یہ انکشاف معروف بھارتی ٹی وی پروگرام ’کون بنے گا کروڑ پتی 18‘ کے دوران کیا۔ پروگرام میں شریک کنٹینٹ کریئیٹر کرتگیہ نیر نے ان سے ’دِس اور دیٹ‘ طرز کا مختصر کھیل کھیلنے کی درخواست کی، جس کے دوران ان سے پوچھا گیا کہ وہ اپنی زندگی کا کوئی گزرا ہوا دن دوبارہ جینا چاہیں گے یا ایسا دن دیکھنا پسند کریں گے جس کا تجربہ انھوں نے پہلے کبھی نہ کیا ہو۔
اس سوال کے جواب میں امیتابھ بچن نے ماضی کے کسی مخصوص دن کا انتخاب کرنے کے بجائے اپنی ایک دیرینہ خواہش کا ذکر کیا۔ انھوں نے بتایا کہ وہ ہمیشہ سے موسیقی سیکھنا اور کوئی ساز بجانا چاہتے تھے، لیکن زندگی میں کبھی باقاعدہ طور پر ایسا کرنے کا موقع نہ مل سکا۔
اداکار کے مطابق ان کے گھر میں مختلف موسیقی کے ساز بھی موجود ہیں، مگر وہ انھیں بجانا نہیں سیکھ سکے۔ انھوں نے کہا کہ جب وہ کسی کو خوبصورت انداز میں گاتے یا ستار جیسے ساز کو مہارت سے بجاتے دیکھتے ہیں تو انھیں اپنی یہ ادھوری خواہش ضرور یاد آتی ہے۔
امیتابھ بچن نے یہ بھی واضح کیا کہ موسیقی سیکھنے کی خواہش اب بھی ختم نہیں ہوئی اور وہ آج بھی امید رکھتے ہیں کہ کبھی نہ کبھی کسی ساز کو بجانا سیکھ سکیں گے۔ ان کے اس اعتراف کو مداحوں کی جانب سے اس لیے بھی دلچسپ قرار دیا جا رہا ہے کیونکہ وہ اداکاری کے ساتھ اپنی آواز میں کئی گانے بھی ریکارڈ کروا چکے ہیں۔
امیتابھ بچن کا شمار بھارتی فلم انڈسٹری کے سب سے کامیاب اور بااثر اداکاروں میں ہوتا ہے۔ کئی دہائیوں پر محیط اپنے فلمی سفر کے دوران انھوں نے سینکڑوں فلموں میں کام کیا، جبکہ گلوکاری اور ٹیلی ویژن میزبانی سمیت مختلف شعبوں میں بھی اپنی صلاحیتوں کا مظاہرہ کیا۔
اس کے باوجود اداکار کا کہنا ہے کہ موسیقی کا کوئی ساز بجانا نہ سیکھ پانا ان چند چیزوں میں شامل ہے جن کا انھیں اپنی زندگی میں آج بھی افسوس ہے۔
