ازبکستان کے دارالحکومت تاشقند میں زیرِ تعمیر نئے قومی عجائب گھر کی تعمیر تیزی سے جاری ہے۔ صدر شوکت مرزیایوف نے منصوبے کا دورہ کرتے ہوئے تعمیراتی کام کا جائزہ لیا اور اسے مقررہ وقت پر اعلیٰ معیار کے مطابق مکمل کرنے کی ہدایت کی۔
نیا عجائب گھر 3.9 ہیکٹر رقبے پر قائم ہوگا جبکہ عمارت کا مجموعی رقبہ 40 ہزار مربع میٹر سے زیادہ ہوگا۔ تین منزلہ مرکزی عمارت کے ساتھ دو زیرِ زمین منزلیں بھی تعمیر کی جائیں گی۔ عجائب گھر میں ایک وقت میں تقریباً 3,500 افراد آسکیں گے اور یہاں تقریباً 10 ہزار تاریخی اور فن پارے نمائش کے لیے رکھے جائیں گے۔
خاص بات یہ ہے کہ عجائب گھر کا 60 فیصد حصہ تعلیم اور تحقیق کے لیے مختص ہوگا۔ یہاں نمائش گاہوں کے علاوہ بڑی لائبریری، آثار کی بحالی کی تجربہ گاہیں، کانفرنس ہال، ریسٹورنٹ اور بچوں کے لیے کھیل کی جگہیں بھی بنائی جائیں گی۔
منصوبے کا نقشہ معروف جاپانی معمار تاداؤ آندو نے تیار کیا ہے، جبکہ نمائش کا تصور جرمن ادارے ایٹیلیئر بروکنر نے بنایا ہے۔ مستقبل میں فرانس کے لوور، امریکا کے میٹروپولیٹن اور برٹش میوزیم جیسے عالمی اداروں کے ساتھ مشترکہ نمائشیں بھی منعقد کرنے کا منصوبہ ہے۔
