ازبکستان کے وزیر خارجہ بختیار سعیدوف نے نئی دہلی دورے کے موقع پر انڈین وزیر خارجہ ایس جے شنکر سے وفود کی سطح پر مذاکرات کیے۔
ازبک وزیر خارجہ بختیار سعیدوف نے ایکس پر اپنے ایک بیان میں کہا کہ وفود کے درمیان ‘کھلی، واضح اور بامقصد’ بات چیت جاری ہوئی۔ انہوں نے بتایا کہ مذاکرات میں دونوں ممالک کے سربراہان کی جانب سے طے کیے گئے اہداف پر عمل درآمد، دوطرفہ تعاون کو تمام شعبوں میں مسلسل آگے بڑھانے اور موجودہ علاقائی و عالمی امور پر توجہ مرکوز رہی۔
بختیار سعیدوف کے مطابق ملاقات میں تجارت، معیشت اور سرمایہ کاری کے شعبوں میں تعاون بڑھانے، ٹرانسپورٹ اور لاجسٹکس رابطوں کو مضبوط بنانے اور دیگر ممکنہ شعبوں میں اشتراک کو مزید وسعت دینے پر تفصیلی تبادلہ خیال کیا گیا۔
انہوں نے اعتماد ظاہر کیا کہ دونوں ممالک کی وزارت خارجہ کے درمیان باقاعدہ اور اعتماد پر مبنی رابطہ دوطرفہ تعاون کو مزید مضبوط کرے گا اور طے پانے والے معاہدوں پر بروقت اور مکمل عمل درآمد یقینی بنانے میں مدد دے گا۔
اس سے قبل ازبک وزیر خارجہ بختیار سعیدوف نے انڈین وزیر خارجہ ڈاکٹر ایس جے شنکر سے ون آن ون ملاقات کی۔ ملاقات میں ازبکستان اور انڈیا کے درمیان اسٹریٹجک شراکت داری اور مختلف شعبوں میں تعاون کو مزید فروغ دینے سے متعلق موجودہ امور کا جائزہ لیا گیا۔
ملاقات کے بعد بختیار سعیدوف نے کہا کہ اعلیٰ سطح پر طے پانے والے معاہدوں کی روشنی میں عملی تعاون میں تیزی سے پیش رفت ہو رہی ہے، جبکہ مختلف سطحوں پر فعال اور بامقصد مذاکرات بھی جاری ہیں۔
