ازبک فضائی کمپنی سینٹرم ایئر تین ستمبر 2026 سے تاشقند اور کراچی کے درمیان براہِ راست باقاعدہ پروازوں کا آغاز کرے گی۔
پاکستان میں ازبکستان کے سفیر علی شیر تختیوف نے کہا ہے کہ تاشقند، کراچی روٹ پر ہفتے میں دو پروازیں چلائی جائیں گی۔ انہوں نے اس پیش رفت کو پاکستان اور ازبکستان کے درمیان سفری اور تجارتی روابط مضبوط بنانے کی جانب ایک اہم قدم قرار دیا ہے۔
علی شیر تختیوف کا کہنا تھا کہ تقریباً 20 ماہ پہلے دونوں ممالک کے درمیان کوئی باقاعدہ براہِ راست پرواز موجود نہیں تھی، تاہم نئے کراچی روٹ کے آغاز کے بعد پاکستان اور ازبکستان کے درمیان ہفتہ وار پروازوں کی مجموعی تعداد آٹھ ہو جائے گی۔
ان کے مطابق لاہور کے لیے ہفتے میں چار، اسلام آباد کے لیے دو اور کراچی کے لیے دو براہِ راست پروازیں چلائی جائیں گی۔
سینٹرم ایئر نے اپریل 2026 میں تاشقند اور لاہور کے درمیان ہفتے میں دو باقاعدہ پروازوں کا آغاز کیا تھا۔ فضائی کمپنی اس سے قبل پاکستان کے ساتھ مسافر اور کارگو روابط بڑھانے کے منصوبوں کا بھی اعلان کر چکی ہے۔
ازبک سفیر نے کہا کہ فضائی رابطوں میں اضافہ دونوں ممالک کے درمیان بڑھتی ہوئی اسٹریٹیجک شراکت داری اور عوامی روابط کی عکاسی کرتا ہے۔
تاشقند اور کراچی کے درمیان براہِ راست پروازوں کے آغاز سے تاجروں، سیاحوں اور طلبہ کو سفر میں آسانی ملنے کی توقع ہے، جبکہ دونوں ممالک کے درمیان تجارت اور سیاحت کو بھی فروغ مل سکتا ہے۔
